Հունիսի 6-ին ՀՀ արտակարգ իրավիճակների նախարար Արմեն Երիցյանն աշխատանքային ընդլայնված խորհրդակցություն անցկացրեց, որի ընթացքում քննարկվեցին հակակարկտային կայանքների արդյունավետությունն առավել բարձրացնելուն վերաբերող հարցեր: Քննարկմանը մասնակցում էր նաև «Ucom» հեռահաղորդակցական ընկերության տնօրեն Հայկ Եսայանը:
Անդրադառնալով հակակարկտային կայանքների աշխատանքին՝ նախարար Երիցյանը կարևորեց «Ucom» ընկերության հետ համագործակցության խորացումը՝ հակակարկտային կայանքների կառավարման ոլորտում առավել արդիական մոտեցումների կիրառման նպատակով: «Մենք պետք է օգտագործենք ժամանակակից տեխնիկայի բոլոր հասանելի միջոցները, որպեսզի հակակարկտային կայանքների աշխատանքը լինի անխափան»,-շեշտեց նախարար Երիցյանը:
Այսօր Հայաստանի Հանրապետությունում գործում է 460 հակակարկտային կայանք (որոնք ապահովում են երկրի հակակարկտային կարիքների մոտ 9%-ը):
«Ucom» ընկերության տնօրեն Հայկ Եսայանը պատրաստակամություն հայտնեց ընկերության տեխնիկական հնարավորություններն ի սպաս դնել հակակարկտային կայանքների կառավարման համար անհրաժեշտ կապն առավել հուսալի և անխափան դարձնելու հարցում:
Կարդացեք նաև
Ամփոփելով ոլորտի մասնագետների կողմից հնչեցված խնդիրներն ու դրանց հնարավոր լուծումների վերաբերյալ առաջարկությունները՝ ԱԻ նախարարը համոզմունք հայտնեց, որ ոլորտի մասնագետների համագործակցությունը կարճ ժամանակում կհանգեցնի մինչ օրս արձանագրված տեխնիկական խնդիրների հիմնավոր լուծմանը. «Մենք պետք է հնարավորինս ապահովագրված լինենք բոլոր տեսակի խափանումներից»,- շեշտել է նախարար Երիցյանը:
Վերոնշյալ ոլորտում ՀՀ արտակարգ իրավիճակների նախարարությունը համագործակցում է նաև ՀՀ գյուղատնտեսության նախարարության հետ:
ՀՀ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐՈՒԹՅՈՒՆ
Տեղեկատվության և հասարակայնության հետ կապերի վարչություն