Գերմանիայի արտաքին գործերի նախարար Ֆրանկ Վալտեր Շտայնմայերը անդրադարձել է 2016թ. հունիսի 23-ին Մեծ Բրիտանիայում տեղի ունեցած հանրաքվեի արդյունքներին, որով հայտնի է դարձել, որ բրիտանացիների մեծ մասը կողմ է, որպեսզի Բրիտանիան դադարեցնի անդամակցությունը Եվրամիությանը։ Այս մասին տեղեկացնում է բրիտանական The Telegraph-ը։
Շտայնմայերը մասնավորապես ասել է, որ Բրիտանիայի անդամակցության դադարեցումից հետո սպասվում են բավականին ծանր աշխատանքներ, բայց Եվրոպան պետք է ընդունի Բրիտանիայի կայացրած որոշումը։ Գերմանիայի ԱԳ նախարարն ասել է, որ ինքը կոչ է արել Եվրամիության հիմնադիր 6 պետությունների ԱԳ նախարարներին հավաքվել առաջիկայում Լյուքսեմբուրգում, որպեսզի միասին կարողանան վերակազմավորել ուժեղ Եվրոպան։
Աղբյուրի փոխանցմամբ՝ այս օրերին գերմանական պաշտոնյաների արտահայտած մտքերը վկայում են այն մասին, որ Եվրոպան ցանկանում է ոչ թե ռևանշ վերցնել Մեծ Բրիտանիայից, այլ կենտրոնանալ միության համար կենսական նշանակություն ունեցող մի շարք ոլորտների ամրապնդման հարցերի վրա։
