«Որպեսզի լարվածությունը թուլանա, իշխանությունները պետք է երկխոսեն ժողովրդի հետ եւ փորձեն խելքին մոտ առաջարկությամբ հանդես գալ»,-«Նոյյան տապան» լրատվական կենտրոնի մամուլի սրահում այսօր ասաց «Հայաստանի հելիոֆիկացիայի ծրագրի» ղեկավար, տեխնոլոգ, «Մտավորականների խորհուրդ» հ/կ անդամ Վահան Համազասպյանը` խոսելով ՊՊԾ գնդի գրավման շուրջ ստեղծված իրավիճակի մասին:
Նրա ձեւակերպմամբ, քաղաքացիներն օտարվել են երկրի գործերից, սպասում են, թե վերջը ինչ պետք է լինի. «Այս վիճակում ՀՀ-ն օր առաջ պետք է շտկի դրությունը: Սերժ Սարգսյանը ոչինչ չի կարող անել, որովհետեւ չունի գիտականորեն հիմնավորված ծրագիր եւ չի կարող երկիրը դուրս բերել տնտեսական ծանր վիճակից: «Սասնա ծռերը» ցույց տվեցին, որ նահանջելու տեղ չկա, ուշքի պետք է գալ»:
Համազասպյանը հիշեցրեց, որ «Հելիոֆիկացիայի ծրագրով» հնարավոր է ՀՀ տնտեսությունը դուրս բերել փակուղուց եւ որպես առաջնահերթություն` մուտք գործել ռուսական շուկա. «Ադրբեջանը 100 միլիարդ դոլարի ներդրումներ ունի ՌԴ-ում, հետեւաբար, ՀՀ-ն պետք է սեփական արդյունաբերությունն ունենա, որ դուրս գա այս վիճակից: Երկիրը պաշտպանելու համար հիմա բոլորը պահանջում են վճարել: Դրա համար պետք է ունենանք փող եւ արդյունաբերություն: Պատերազմող երկիրը իրավունք չունի կորցնել իր արդյունաբերությունը: Ապրիլյան պատերազմը ցույց տվեց, որ բանակում շատ են «ատկատները» եւ գողությունը: Հարգարժան գեներալներին հիշեցնեմ` այն զենքը, որը կրում են, միայն իրենց մարմինը պաշտպանելու համար չէ»:
Լուիզա ՍՈՒՔԻԱՍՅԱՆ
