«ԷՌԱ ՊՊ» ՍՊԸ-ն դիմել է ՀՀ էկոնոմիկայի նախարարություն` «Ալյանս» ազատ տնտեսական գոտու շահագործողի թույլտվությունը դադարեցնելու խնդրանքով: Այս մասին օգոստոսի 4-ի կառավարության նիստում վարչապետ Հովիկ Աբրահամյանին կզեկուցի էկոնոմիկայի նախարար Արծվիկ Մինասյանը: Այս ընկերության արտադրանքը նախատեսվում էր արտահանել Ռուսաստանի Դաշնություն, սակայն, ըստ Արծվիկ Մինասյանի, «ՌԴ-ում տնտեսական վիճակի վատթարացման պատճառով բարդ ֆինանսատնտեսական իրավիճակ է ստեղծվել, ինչի արդյունքում ընկերությունը հարկադրված է սառեցնել իր գործունեությունը»:
Ի դեպ, «ԷՌԱ ՊՊ» ՍՊԸ-ն մոտ երկու տարի առաջ էր «Ալյանս» ազատ տնտեսական գոտու «ՌԱՕ Մարս» տարածքում շահագործողի թույլտվություն ստացել: Այս ընկերությունը ազատ տնտեսական գոտում լուսատեխնիկական սարքերի արտադրության գործունեություն պետք է իրականացներ: Շահագործողի թույլտվության գործողության ժամկետը սահմանվել էր 5 տարի:
Ըստ պարոն Մինասյանի, Հայաստանում ազատ տնտեսական գոտիները նպատակ ունեն ներգրավել ներդրումներ, խթանել բարձր եւ տեղեկատվական տեխնոլոգիաների ոլորտում ստեղծված արդյունքի արտահանումը, նպաստել տվյալ հատվածում հայկական բրենդի ճանաչմանն ու տարածմանը:
Լուսինե ԲՈՒԴԱՂՅԱՆ
