Քաղաքագետ Լեւոն Շիրինյանի համոզմամբ, ԵԱՀԿ ՄԽ համանախագահները ԼՂ հիմնահարցի կարգավորման այս փուլում ՌԴ-ին փոքր ինչ առավել դերակատարություն տալու ներքին համաձայնություն ունեն: Հաշվի առնելով, որ հրադադարի ռեժիմի ձեռք բերման հարցում էլ ՌԴ-ն մեծ դերակատարություն է ունեցել:
Ըստ նրա, ՀՀ իշխանությունները պետք համանախագահների հետ լինեն երկրորդ գծի վրա. «Համանախագահները հո չեն երդվել՝ ՀՀ շահերը սպասարկել, մեր իշխանությունները պետք է դիվանագիտական ճանապարհով աշխատեն համանախագահների հետ»:
Մեր հարցին՝ Սարգսյան-Ալիև հանդիպումից հետո ՌԴ նախագահ Վլադիմիր Պուտինի հայտարարությունը՝ Հայաստանն ու Ադրբեջանը կգտնեն փոխզիջումային, առանց հաղթողների ու պարտվողների կարգավորում ինչ ուղերձ ուներ, հնարավո՞ր է խնդրի լուծման ուղղությամբ կոնկրետ քայլերի պահանջ էր, պարոն Շիրինյանն ասաց՝ մոտ ապագայում հիմնահարցի լուծման հավանականություն չի տեսնում:
«Եթե Պուտինը ռազմական ճնշում չգործադրի կամ Ադրբեջանի կամ Հայաստանի վրա, տարածքային ամբողջականություն, ազգերի ինքնորոշում բանաձեւերը որեւէ արդյունք չեն տա, հնարավոր չէ: Պուտինին պետք է փոխանցել հետեւյալը, իրենք Ղրիմի հարցում թող այնպես վարվեին, որ ոչ հաղթող, ոչ պարտվող լիներ: Եթե հիմա հաղթող կա, ապա այդ հաղթողը թոզ զադնի տա ու Ղրիմը հայտարարեն անկախ տարածք, կլինի՞ նման բան: Մենք այս հարցերում պետք է զուգահեռներ տանենք: Նման բան հնարավոր չէ, որ չլինի ոչ հաղթող, ոչ պարտվող»,- Aravot.am-ին ասաց պարոն Շիրինյանը:
Կարդացեք նաև
Անդրադառնալով խոստացված, բայց այդպես էլ Ռուսաստանից Հայաստան չհասած 2 միլիոն դոլարի սպառազինությանը, ինչի մասին այսօր լրագրողների հարցին ի պատասխան, լռել էր ՌԴ ՊՆ նախարար Սերգեյ Շոյգուն, պարոն Շիրինյանը շարունակեց. «Ադրբեջանն իր փողով գնում է, Հայաստանն էլ երկիրը չզարգացնելով՝ ողորմություն է խնդրում: Ինչ է նշանակում ուրիշի վարկով ուրիշից զենք գնես, այն էլ այդ քանակով: Դրա համար չեմ զարմանում, որ մեզ եւ Ադրբեջանին հավասար հարթության վրա չեն դնում, իսկ ինչու պետք է դնեն: Ինչքան էլ բողոքեն, Ռուսաստանն այդպես էլ շարունակելու է»:
Արփինե ՍԻՄՈՆՅԱՆ
