Օգոստոսի 29-ին ԱԿՈՒՄԲ-ում կայացավ «Ֆրեսկո» արդի արվեստի և հոգևոր ֆիլմերի 3-րդ միջազգային փառատոնի ամփոփիչ մամուլի ասուլիսը: Ներկայացվեցին մրցանակակիր ֆիլմերը: Ի թիվս այլ մրցանակների՝ Գուժ Թադեւոսյանի «Եվ կրկեսը ժամանեց» ֆիլմն արժանացավ «Լավագույն ուղերձ սեր» մրցանակին, նույն մրցանակին արժանացավ նաեւ Լիլիթ Մովսիսյանի «Խիոն», իրանցի Մուհամեդ Ֆարահանիի «Գողը» «Լավագույն ուղերձ Քաջություն» մրցանակը ստացավ, Նատալյա Բելյաևայի (Ուկրաինա, Ռուսաստան) «Ընտրյալները»՝ «Լավագույն ուղերձ հավատ»: ««Լավագույն ուղերձ մարդասիրությունը» շնորհվեց իսպանացի Պեդրո Սոլիս Գարսիայի «Լարեր» ֆիլմին, «Լավագույն ուղերձ Խաղաղությունը»՝ Նինա Վեդմիցկայայի (Ռուսաստան) «Չսովորած դասը 14/41»-ին, «Լավագույն ուղերձ Զղջումը»՝ Վիկտորյա Կոզելցովայի (Ռուսաստան) «Վերջին հանգրվանը աշխատանքին» եւ այլն: Խաղաղություն եւ սեր սփռելու համար հատուկ մրցանակ ստացավ Ղեւոնդ Վարդապետը, մարդասիրություն սերմանելու համար՝ լուսանկարիչ Դմիտրի Բրիկմանը:
Փառատոնի կազմակերպիչները նշեցին, որ մրցանակները պատրաստվել են Խարբերդի մանկատանը, դիպլոմներն էլ ապրիլքսանչորսյան ծաղկաթերթերից են: Փառատոնի ծրագրերի պատասխանատու Աննա Կարապետյանը նշեց, որ «Ֆրեսկո» փառատոնի գաղափարը արդի արվեստի միջոցով մեր արժեքները քարոզելն է: Նրա խոսքով. «Փառատոնի անունը թարմություն է թարգմանվում, թարմություն բառը մեզ հուշում է, որ մեր ներսը թարմացնելու կարիք կա»: Նա նաեւ հավելեց, որ փառատոնի ժամանակ չկա բաժանում սոցիալական խմբերի միջեւ, բոլորը հավասար են՝ անկախ նրանից, ով ինչ խնդիր ունի:
Փառատոնի հյուրերը եւս կամավորական հիմունքներով են միացել, իսկ նախագծի հոգեւոր առաջնորդն է Բագրատ սրբազանը:
Կարդացեք նաև
Երուսաղեմի Սուրբ Հրեշտակապետաց Վանքի վանահայր հայր Ղևոնդ վարդապետ Հովհաննիսյանը, որ փառատոնի պատվավոր հյուրերից էր, նշեց, որ թեեւ «Ֆրեսկոն» երեք տարեկան է, սակայն կայացած է, ու իր մեջ խտացած շատ բան է ամփոփում, դա հայ մշակույթի, քրիստոնեության եւ մեր վանքերի ջատագովությունն է: Հոգեւորականի ձեւակերպմամբ. «Փառատոնը կայացած է նաեւ նրանով, որ մեջքին «կանգնած» է 1700 տարվա պատմություն: Ֆիլմերով, որ ցուցադրվեցին փառատոնի ընթացքում, սովորում ենք, որ այսքան ատելություն ու պատերազմ կա աշխարհում, սակայն չնայած դրան, մարդիկ աշխարհի մի փոքր անկյունից բարության պատգամներ են փոխանցում նման ֆիլմ նկարելով»:
Ռուսաստանը ներկայացնող ռեժիսոր Նատալյա Բելյաեւան տպավորված էր փառատոնի ձեւաչափով եւ գաղափարով: Նա ասաց, որ նման այլ փառատոն չի ճանաչում: «Ինձ համար մեծ պատիվ էր մաս կազմել այս փառատոնին եւ ծանոթանալ հրաշալի մարդկանց հետ»,-հավելեց ռեժիսորը:
Փառատոնի կազմակերպիչները հայտնեցին, որ բացօթյա՝ Կարապի լճի տարածքում իրենց ցուցադրումներից մեկը չի կայացել, քանի որ օգոստոսի 26-հանրահավաք է եղել Ազատության հրապարակում, ու իրենք մեկ օր կորցրել են:
Գոհար ՀԱԿՈԲՅԱՆ
