Սեպտեմբերի 13-ին նաիրիտցիները, «Նաիրիտում» ներդրում անել ցանկացող գործարարի հետ պետք է հանդիպեին արդեն նախկին վարչապետ Հովիկ Աբրահամյանին, սակայն, ինչպես ասում են, շաբաթն ուրբաթից շուտ եկավ: Վարչապետն այսօր հրաժարական տվեց: Այն պահին, երբ վարչապետն իր հրաժարականի տեքստն էր կարդում, գործարանի նախկին աշխատակիցները կառավարության շենքի առաջ կրկին բողոքի ակցիա էին անում:
Aravot.am-ի հետ զրույցում գործարանի նախկին առաջատար ինժեներ Կարինե Շահվերդյանն ասաց, որ նաիրիտցիները, լսելով Հովիկ Աբրահամյանի հրաժարականի լուրը, «շոկի» մեջ են ընկել: Նրա խոսքերով, 4 օրից ներդրող Աշոտ Գրիգորյանն ու նրա պատվիրակությունը պետք է հանդիպեին վարչապետին` քննարկելու ներդրումային ծրագիրն ու «Նաիրիտի» վերագործարկման հարցը: Սակայն մեկ օր առաջ, ինչպես պատմեցին նաիրիտցիները, կառավարության աշխատակազմի ղեկավար-նախարար Դավիթ Հարությունյանը նամակ է գրել գործարար Աշոտ Գրիգորյանին եւ հայտնել, որ «վարչապետն այլեւս Հովիկ Աբրահամյանը չէ եւ հանդիպումը չի կարող կայանալ»:
Կարինե Շահվերդյանի խոսքերով, իրենք հույս ունեն, որ այս հարցը չի քնեցվի եւ նոր վարչապետը կքննարկի.
Կարդացեք նաև
«Ես չեմ ուզում անձնավորել վարչապետին, կապ չունի՝ ով ումից հետո է, ով` ումից հետո է նշանակվում, միեւնույն է, վարչապետի հետ արդեն պայմանավորվածություն կա, նոր վարչապետն այդ գործընթացը կշարունակի»:
Մանրամասները` տեսանյութում
Այսօր կառավարության առաջ բողոքի ցույց պետք է անեին նաեւ Վանաձորի Քիմպրոմի աշխատակիցները, սակայն վարչապետի հրաժարականի լուրը հաշվի առնելով` չէին եկել:
Լուսինե ԲՈՒԴԱՂՅԱՆ
