Սեպտեմբերի 26-ից մեկնարկել է «Գութան» ազգագրական երգի-պարի փառատոնը, որին մասնակցում է 15 խումբ, այդ թվում՝ «Ակունքը», «Կարինը», «Մարաթուկը», «Նուբարը», «Սասնա ծռերը» եւ այլն:
Փառատոնը կազմակերպել է «Մրո» հայ ազգային երգարվեստի կենտրոնը՝ Արսեն Գրիգորյանի ղեկավարությամբ եւ մշակույթի նախարարության աջակցությամբ:
Ինչպես Aravot.am-ի հետ զրույցում նշեց «Նուբար» հայ ավանդական երգի-պարի համույթի ղեկավար, երաժշտագետ Լուսինե Նազարյանը, սեպտեմբերի 27-ին էլ նախատեսվում է ֆլեշ-մոբ՝ խմբերի մասնակցությամբ՝ «Գութանի» շապիկներով: «Արդեն երրորդ տարին է նման միջոցառում է կազմակերպվում, մասնակիցները դուրս կգան փողոց, կբաժանեն պաստառներ ու թռուցիկներ»,-ասաց նա:
Կարդացեք նաև
Լուսինե Նազարյանը հավելեց, որ փառատոնի մասնակից 15 խմբերից 8-ը հոկտեմբերի 2-ին կմեկնեն Արցախ, որտեղ հոկտեմբերի 3-ին տեղի կունենա երկրորդ համերգը՝ Ստեփանակերտի Վերածննդի հրապարակում, իսկ Երեւանում՝ մեծ համերգ կլինի սեպտեմբերի 28-ին՝ Կասկադում:
«Նուբարի» ղեկավարի խոսքով, ինչպես նախորդ փառատոներին, այս տարի էլ խմբերի առաջ խնդիր է դրվել ներկայացնել է 1-2 տարածաշրջան: Իսկ երկրորդ պահանջն է՝ որեւէ հայրենասիրական երգ հնչեցնելը:
«Համերգը բացվելու է Կոմիտասի ձայնով, հետո բոլոր խմբերը միասին կերգեն Գութանի երգը: Այս տարի բոլորը միասին կերգեն «Հայեր միացեք»-ը, որովհետեւ «Գութան-2016-ը» նվիրվում է ապրիլյան պատերազմում զոհված հայորդիներին»,-ասաց մեր զրուցակիցը;
Ինչ վերաբերում է «Նուբարին», խումբը շարունակում է համշենական շարքը, որ նախաձեռնել էր անցյալ տարի, նաեւ ավելանալու է Սյունիքի, մասնավորապես Գորիսի 1 նմուշ, իսկ Արցախում կներկայացվի Կարինի արվեստը, որի մեծ մասը Լուսինե Նազարյանի բանահավաքչական աշխատանքի արդյունքն է:
Aravot.am-ը հետաքրքրվեց՝ մեծացե՞լ է հետարքրքությունը «Գութան» փառատոնի հանդեպ:
«Հետաքրքրություն կա եւ խմբերի, եւ հանդիսատեսի կողմից, մնում է՝ միայն ֆինանսավորող գտնվի, Կասկադը միշտ էլ լեփլեցուն է լինում, խմբերի ցանկությունը՝ մեծ»,- հայտնեց «Նուբար» հայ ավանդական երգի-պարի համույթի ղեկավարը:
Գոհար ՀԱԿՈԲՅԱՆ
Լուսանկարը՝ Լուսինե Նազարյանի ֆեյսբուքյան էջից:
