«Ես մտածում եմ, որ պետք է արտաբյուջե, որպեսզի հնարավոր լինի որոշ ծրագրեր զարգացնել, մանավանդ մենք ունենք գիտական ինստիտուտներ, որտեղ առանց արտաբյուջե հնարավոր չէ գիտություն զարգացնել: Դրա համար համարում եմ, որ պետք է»,- խորհրդարանում լրագրողների հետ զրույցում ասաց գյուղատնտեսության նախարար Իգնատի Առաքելյանը:
Նախարարը ծանոթ չէր ՀՀ առաջին նախագահ Լևոն Տեր-Պետրոսյանի` վարչապետ Կարեն Կարապետյանին ուղղված առաջարկներից, մասնավորապես, արտաբյուջեներից հրաժարվելու մասին:
Հիշեցնենք, երեկ առաջին նախագահը երկու առաջարկ էր արել Կարեն Կարապետյանին: Դրանք են`վերացնել նախարարությունների, պետական այլևայլ գերատեսչությունների, ինչպես և տեղական ինքնակառավարման մարմինների արտաբյուջետային հաշիվներն ու հիմնադրամները եւ անմիջապես վավերացնել ՄԱԿ-ի Հակակոռուպցիոն կոնվենցիայի` պետական պաշտոնյաների ապօրինի հարստացման քրեականացմանը վերաբերող 20-րդ հոդվածը՝ օժտված նաեւ հետադարձ ուժով:
Իգնատի Առաքելյանի նախարարությունը պատրաստ չէ հրաժարվել իր արտաբյուջեներից:
Կարդացեք նաև
Անդրադառնալով կառավարության ծրագրին` նախարարն ասաց, որ պետք է տեղավորվեն այսօրվա հաստատված բյուջեի գումարների սահմաններում. «Դրա համար պետք է որոշենք, թե որ մեխանիզմներն ընտրենք սուբսիդավորման, որ տարբեր ճյուղերով գնանք եւ կարողանանք անասնաբուծությունը, սերմնաբուծությունը, պարարտացումն ապահովենք: Բայց դա դեռ հիմա տեսլական է, որ պետք է քննարկենք, բաշխում անենք բյուջեում»:
Նելլի ԳՐԻԳՈՐՅԱՆ
