Հունահռոմեական ոճի ըմբշամարտի Հայաստանի ազգային հավաքականի գլխավոր մարզիչ Լեւոն Ջուլֆալակյանը ամփոփեց օրերս անցկացված Հայաստանի առաջնության արդյունքները:
Մարզիչը տեղեկացրեց, որ մասնակցությունից ազատվել էին Միհրան Հարությունյանը, Արսեն Ջուլֆալակյանը, Վարշամ Բորանյանը եւ Արթուր Ալեքսանյանը, իսկ մյուսների մասնակցությունը պարտադիր էր:
Լեւոն Ջուլֆալակյանի խոսքերով, սկսվել է նոր օլիմպիական շրջափուլը եւ իրենք այժմվանից պետք է պատկերացնեն, թե ինչ նոր երիտասարդ ըմբիշներ պետք է համալրեն ընտրանու կազմը եւ պատկերացում կազմեն, թե ինչ հավաքականով են մոտենալու Տոկիոյի օլիմպիական խաղերին:
Սակայն գլխավոր մարզիչը դժգոհ է Հայաստանի առաջնության մասնակիցների քանակից: «Ընդամենը 63 ըմբիշ էր, ինչը լուրջ մտահոգության տեղիք է տալիս: Պատճառները մի քանիսն են: Հիմնականներից մեկն այն է, որ զինվորական ծառայությունից հետո շատ քչերն են վերադառնում մեծ սպորտ: Առաջնային խնդիր եմ համարում, որ մարզիչները տեղերում իրենց աշխատանքին մոտեցումն են թուլացրել: Չի կարելի ունենալ շուրջ 150 մարզիչ եւ մասնակիցների քանակը լինի 63 հոգի», – ասաց գլխավոր մարզիչը եւ ավելացրեց, որ չնայած ըմբիշների սակավությանը, կան լավ մարզիկներ, որոնց հետ կարելի է հույսեր կապել, աշխատել ու այդ քիչ քանակից էլ որակ եւ հաղթանակներ ապահովել:
Կարդացեք նաև
Լեւոն Ջուլֆալակյանը խոսեց նաեւ առաջիկա ծրագրերի եւ մրցումների մասին: Դեկտեմբերի 9-ից 12-ը Հունգարիայում անցկացվելու է ոչ օլիմպիական քաշային կարգերի՝ 71 եւ 80 կգ, աշխարհի առաջնությունը, որին մասնակցելու են Վարշամ Բորանյանը եւ Սարգիս Քոչարյանը: Եկող տարվա փետրվարին հավաքականը կմասնակցի աշխարհի գավաթի խաղարկությանը, մայիսին՝ Եվրոպայի, օգոստոսին՝ աշխարհի առաջնությանը, որոնց նախապատրաստվելու համար պլանավորված են ուսումնամարզական հավաքներ, մասնակցություններ միջազգային մրցաշարերին, որոնց ընթացքում կձեւավորվի ազգային հավաքականի կազմը:
Աշոտ ՀԱԿՈԲՅԱՆ
Լեւոն Ջուլֆալակյանի ասուլիսն ամբողջությամբ՝ «Առավոտ» օրաթերթի առաջիկա համարներից մեկում
