Այսօր Էրեբունի եւ Նուբարաշեն վարչական շրջանների ընդհանուր իրավասության առաջին ատյանի դատարանում շարունակվում էր Սարի թաղում ոստիկանների հետ բախումների ընթացքում կալանավորված անձանց գործի քննությունը:
Այս դատական նիստում դատավորը ամբաստանյալներին հորդորեց ներկայանալ, հարցրեց ընտանեկան կարգավիճակը, որտեղ են աշխատում, նախկինում դատվածություն ունեն, թե ոչ:
Պարզվեց՝ գործով բոլոր սարի թաղցի ամբաստանյալները նախկինում դատված են եղել տարբեր հանցանքների համար, բացառությամբ Հարություն Թորոսյանի: Բոլորն էլ մասնավոր աշխատանքով են զբաղված եղել՝ շինարարություն, կահույքի արտադրամաս եւ այլն:
Կարդացեք նաև
Հրայր Իսախանյանն ասաց, որ ամուսնացած է, խնամքին ունի անչափահաս երեխաներ: Հարցին՝ նախկինում դատապարտվա՞ծ եք եղել՝ նա պատասխանեց. «Այո, դանակահարության համար»: Նա ասաց, որ հիվանդ է տուբերկուլյոզով, հաշվառված է նաեւ Ավանի հոգեբուժարանում: Նրա պաշտպանն ուղղեց, որ հաշվառված է Նորի հոգեբուժարանում:
Մյուս ամբաստանյալ Անդրանիկ Քոսեյանն ասաց, որ խնամքին ունի 3-ամյա երեխա, նախկինում դատապարտված է եղել: Թե ինչի համար՝ պատասխանեց. «Բանակից եմ փախել»:
Ամբաստանյալ Էդուարդ Զեյթունյանն էլ ասաց, որ գողության համար է դատապարտված եղել: Նա ասաց, որ սրտի եւ ողնաշարի հետ է կապված առողջական խնդիրներ ունի:
Զեյթունյանի պաշտպան Լիպարիտ Սիմոնյանը հանդես եկավ միջնորդությամբ՝ իր պաշտպանյալին կալանքից անհապաղ ազատ արձակելու մասին: Նա ասաց, որ լրացել է Էդուարդ Զեյթունյանի՝ կալանքի տակ պահվելու ժամկետը եւ նա ենթակա է ազատ արձակման: Մեղադրող կողմը առարկությամբ հանդես եկավ: Դատավորը գնաց խորհրդակցական սենյակ՝ որոշում կայացնելու:
Դատարանը որոշեց միջնորդությունը մերժել:
Հրայր Իսախանյանի պաշտպան Գրիշա Բալասանյանը նույնպես միջնորդություն ներկայացրեց՝ իր պաշտպանյալի խափանման միջոցը փոխելու: Գրիշա Բալասանյանն ասաց այն հիմքերը, որով Հրայր Իսախանյանին կալանավորել են: Նա ասաց, որ իր պաշտպանյալը երբեւէ չի թաքնվել նախաքննություն իրականացնող մարմնից, այժմ էլ հիմքեր չկան ասելու, որ դատաքննության ընթացքում կթաքնվի, կփորձի ճնշում գործադրել վկաների նկատմամբ, նրանք հարցաքննվել են եւ հայտնել իրենց դիրքորոշումը: Նա ասաց, որ Հրայր Իսախանյանը պնդել է, որ որեւէ առնչություն չունի ոստիկանության աշխատակիցներին հարվածելու եւ նրանց նկատմամբ բռնություն գործադրելու մեջ: Գրիշա Բալասանյանն անձնական ազատության եւ մի շարք այլ իրավունքներ վկայակոչեց՝ ընդգծելով, որ մարդուն ազատությունից զրկելու համար պետք է հիմնավոր կասկածներ լինեն, ինչը չի եղել:
Հաջորդ դատական նիստը կկայանա նոյեմբերի 25-ին, ժամը 16-ին:
Հռիփսիմե ՋԵԲԵՋՅԱՆ
դուք սպասեցէք, տեսնենք այսպիս ինչե՜ր բացահայտվելու են, երբ որ դատավարությունները սկսին, այդ «Սասնա… Հանգստափչիկների» մասին