Մեր անտարբերության եւ անպատրաստվածության հետեւանքով ինքներս ձեւավորեցինք օլիգարխիան եւ այն շատ արագ սերտաճեց իշխանության հետ ու դարձավ թելադրող ուժ: Քրեական հեղինակությունները նույն կերպ շատ արագ գտան իրենց տաքուկ տեղը եւ դարձան միջնորդ՝ իշխանության եւ օլիգարխների միջեւ, դարձնելով համակարգը քրեաօլիգարխիկ:
Ստեղծված իրավիճակում, երբ օլիգարխները իշխանության մաս են կազմում, երկրի համար անկանխատեսելի ծանր հետեւանքներով է հղի նրանց ախորժակը զսպելու ուղղությամբ ձեռնարկված պոռթկումային ու կտրուկ ցանկացած քայլ:
Անհրաժեշտ է առանց մեծ ցնցումների վերակառուցել համակարգը ժողովրդավարական հիմքերի վրա: Առաջին հերթին օրենսդրությունը պետք է լեգիտիմացնել, իրավապահ եւ արդարադատական համակարգերը պետք է սկսեն գործել ժողովրդավարական հիմքերի ու սկզբունքների վրա: Պետք է հայտարարվի օրենքի դիկտատուրա:
Այս կարեւոր հարցերում քաղաքացիական հասարակությունը պետք է ունենա իր ուրույն եւ կարեւոր դերակատարությունը: Այն պայմանավորված պետք է լինի բարձր պատասխանատվությամբ ու պահանջկոտությամբ: Մեզանում ներկայումս քաղաքացիական հասարակության ակտիվ օղակները օժտված չեն բարձր պատասխանատվությամբ, չունեն եւ իրազեկվածության բարձր աստիճան: Բացակայում է առողջ քննադատությունը, որը զերծ է էմոցիաներից եւ կանխակալ շահագրգիռ ձգտումներից:
Կարդացեք նաև
Փոխարենը կա անձնական շահերից, նախանձից եւ չուզողությունից դրդված՝ քննադատելու սովորույթը:
Անկախ ժողովրդավարական մեր հանրապետությունում ներկայումս գնալով մեծ տարածում է գտնում կեղծ ընդդիմության՝ ժողովրդավար երեւալու եւ մասսաներին իր կողմը գրավելու, ուշադրության արժանանալու ոչ կառուցողական եւ իռացիոնալ քննադատությունը, ինչը մեծ սպառնալիք է ժողովրդավարական համակարգի եւ ամբողջ հասարակության համար:
Այս եւ այլ սպառնալիքներ ու վտանգավոր երեւույթներ չեզոքացնելու համար նախ իշխանությունը պետք է դադարի կերակրաման լինելուց, որը գայթակղում եւ դեպի իրեն է հրապուրում դատարկ հոգով ու էությամբ եւ լիքը գրպանով մորթապաշտներին:
Երբ իշխանությունը քաղաքական կամք կդրսեւորի եւ կսկսի ավելի արդյունավետ ծառայել ժողովրդին, կունենանք սպասված արդյունք, այն է՝ առողջ քաղաքացիական հասարակություն եւ ժողովրդին ծառայող վստահելի իշխանություն՝ լցված ազգային արժեհամակարգով:
Այս առումով նոր կառավարության եւ վարչապետ Կարեն Կարապետյանի գործունեության առաջին քայլերը կարելի է գնահատել որպես հույսի նոր սկիզբ: Պետք է հավատ ընծայել ու շանս տալ… երկրում նոր՝ որակական փոփոխություններ ունենալու համար:
ԽԱՉԻԿ ՄԱՐՈԶՅԱՆ
«Իրավաբանների եւ հոգեբանների միջազգային ասոցիացիայի»
հիմնադիր նախագահ
«Առավոտ»
15.11.2016
