«Վարչապետ Կարեն Կարապետյանն արդեն ՀՀԿ ներկայացուցիչ է, ՊՆ նախարար Վիգեն Սարգսյանը՝ նույնպես: Բնականաբար, ՀՀԿ համագումարի պատվիրակները իրենք քվեարկությամբ կորոշեն, բայց, բնականաբար, վարչապետն ու ՊՆ նախարարը չեն կարող լինել շարքային անդամներ, նրանք կլինեն ղեկավար կազմի առանցքային ներկայացուցիչներ: Երեկ եւ այսօր նրանց անդամակցումից հետո գործընթաց է սկսվել կուսակցության լայն անդամակցման, յոթ հազարից քաղաքացիներ անդամակցել են կուսակցությանը»,- քիչ առաջ ՀՀԿ ԳՄ նիստից հետո ասաց ՀՀԿ խոսնակ Էդուարդ Շարմազանովը:
Հարցին, թե վերլուծություն ունե՞ք՝ ինչ սկզբունքով են յոթ հազար քաղաքացիներն անդամագրվել ՀՀԿ-ին, պարոն Շարմազանովը պատասխանեց. «Վերլուծություն անելու համար ժամանակ է պետք, դժվար թե ես կես ժամվա ընթացքում, եթե նույնիսկ Նապոլեոն Բոնապարտն էլ լինեի կարողանայի վերլուծություն անել: Իսկ թե ինչպիսի տեսք կունենա գերագույն մարմինը, կլինեն փոփոխություններ, բայց եթե բոլոր փակագծերը բացեմ, դժվար թե վաղը գաք լուսաբանեք»:
Հարցին, թե ինչ ակնկալիքներ ունեն ՀՀԿ-ին անդամագրվող վարչապետից, ՀՀԿ խոսնակը պատասխանեց. «Կարեն Կարապետյանի մուտքը ՀՀԿ կբերի նոր, դրական որակ, դրական փոփոխություններ, նոր լիցք: Հակառակ դեպքում ինքը նման որոշում չէր կայացնի: Այս ամիսներին վարչապետը ցույց է տվել, որ ինքը բավական պատվախնդիր ու սկզբունքային անձնավորություն է, զգում է իր վրա դրված առաքելությունը, մենք՝ բոլորս, սատարելու ենք կառավարության ջանքերին»:
Հարցին, թե ձեզ համար կարեւո՞ր է, որ ՀՀԿ-ին անդամակցող պաշտոնյան տեղյակ լինի Նժդեհի գաղափարախոսությանը, նժդեհականությանը, պարոն Շարմազանովը պատասխանեց. «Բոլոր նրանք, որոնք անդամակցել են ու չեն հասցրել խորությամբ ծանոթանալ մեր կուսակցության ազգային-պահպանողական գաղափարախոսությանը, անհոգ եղեք, ես հասկանում եմ՝ ում եք ակնարկում, պարոն նախարարին (խմբ. Գյուղատնտեսության նախարար Իգնատի Առաքելյանն էր, որ ծանոթ չէր Նժդեհի գաղափարախոսությանը) իր հետ անձամբ կծանոթացնեմ Նժդեհի գաղափարախոսությանը»:
Կարդացեք նաև
Արփինե ՍԻՄՈՆՅԱՆ
Փչացրին …