ԱԺ-ում այսօր Պաշտպանության, ազգային անվտանգության եւ ներքին գործերի մշտական հանձնաժողովի կազմակերպած «Պահեստազորային պատրաստության համակարգի կատարելագործումը» թեմայով խորհրդարանական լսումների ժամանակ պատգամավոր Թեւան Պողոսյանը ՀՀ ԶՈՒ ԳՇ Կազմզորահավաքային վարչության պետ, գեներալ-մայոր Կամո Քոչունցին հարցրեց՝ «ի՞նչ դասեր եք քաղել «Շանթ 2015» զորավարժություններից եւ ապրիլյան պատերազմից՝ պահեստազորային համակարգի կատարելագործման համատեքստում»:
«Ապրիլյան դեպքերից հետո իրականացվել են լրացուցիչ միջոցառումներ, այդ թվում՝ սփյուռքի կամավորականների ներգրավվածությամբ պատրաստության միջոցառումներ: Իրականացվել է նաեւ պահեստազորայինների պատրաստություն՝ անհրաժեշտ մասնագիտությունների գծով»,-պատասխանեց Կամո Քոչունցը:
Թեւան Պողոսյանն առարկեց. «Եկեք ազնիվ լինենք՝ «Շանթ 2015»-ն ավելի շատ դասեր չտվեց, քան ապրիլյան պատերազմը: ՀՀ եւ Արցախի ղեկավարություն մեկ անգամ չի ասել, որ մատների արանքով ենք նայել պահեստազորի խնդիրներին…»:
Կարդացեք նաև
Կամո Քոչունցն արձագանքեց. «Մատների արանքով երբեւէ չի նայվել պահեստազորայինների պատրաստության գործընթացին՝ մինչեւ ապրիլյան գործողությունները եւ դրանցից հետո: Աշխատանքներ կատարվել են՝ կամավորականների կտրվածքով, նաեւ անհատ կամավորականների կտրվածքով՝ մինչեւ ապրիլյան գործողությունները: Գործակցել ենք ԵԿՄ-ի, «Հայոց Արծիվների» հետ»:
Թեւան Պողոսյանը շարունակեց. «Դա միայն իմ կարծիքը չէ, այլեւ շատ հայրենակիցների, եւ Ձեր վերադասը նույնպես գիտի այդ մասին»:
Պաշտպանության նախարարի տեղակալ Արա Նազարյանն էլ միջամտեց՝ հորդորելով պահանջատեր չլինել, քանի որ նախարարությունն անում է հնարավոր ամենը:
Լուիզա ՍՈՒՔԻԱՍՅԱՆ