Անցած տարի մահացած Մերի Մարգարյանի գործով այսօր դատարանում ցուցմունք տվեց նաեւ «Էրեբունի» բժշկական կենտրոնի մանկաբարձ- գինեկոլոգ Նորայր Ղուկասյանը:
Վկայի պատմելով՝ Մերի Մարգարյանի վիճակի մասին իմացել է հուլիսի 26-ին նրա սկեսրայրից, ինքը Մերիի ամուսնու ազգականն է. «Մերիի սկեսրայրը զանգեց, ասաց, որ Մերին ջերմություն ունի, տան պայմաններում բուժում է ստանում, բայց վիճակի մեջ փոփոխություն չկա: Առաջարկեցի բերել «Էրեբունի» հետազոտման, ասաց՝ չէ, հեռու է: Ինձ հարցրեց` ինչ կարծիքի եմ Շուշանիկ Բախշյանի մասին, ասացի` բարձր կարծիքի եմ, այսքանով խոսակցությունն ավարտվել է: Հաջորդ օրը առավոտյան 07:00-ի կողմերը ինձ զանգեց նորից ու ասաց, որ զանգեմ Շուշանիկ Բախշյանին, ասեմ` Մերին իմ ազգականն է, որ նորմալ վերաբերի, ես էլ զանգեցի բժշկուհուն, ինքն արդեն հիվանդանոց էր գնում»:
Նորայր Ղուկասյանը նաեւ պատմեց, որ ավելի ուշ տիկին Բախշյանն իրեն է զանգել, ասել, որ Մերի Մարգարյանի վիճակը վատանում է, ցանկանում են բազմապրոֆիլային հիվանդանոց տեղափոխել. «Ժամը 15:10-ին Մերին ընդունվել է մեզ մոտ «արյունազեղում հարցականով» ախտորոշմամբ, անմիջապես նյարդաբանն է զննել, ասել է, այնուհետեւ ռեանիմատոլոգն է նայել, անմիջապես որոշվել է նրան տեղափոխել վերակենդանացման բաժանմունք»:
Պարոն Ղուկասյանի խոսքով, 16:30-ի սահմաններում որոշվել է Մերի Մարգարյանին կեսարյան հատում անել, քանի որ պտղի սրտի զարկի բաբախը գնալով նվազում էր: Նա նույնպես հաստատեց, որ ծննդկանին մինչեւ վիրահատելը հետազոտության արդյունքներն են բերվել, որով ծննդկանի մոտ հաստատվել է ՀԵԼԼՓ համախտանիշ:
Կարդացեք նաև
Պաշտպանական կողմը այս վկայից էլ հետաքրքրվեց՝ ինչու է Մերի Մարգարյանը հիվանդանոց ընդունվել ժամը 15:10-ին, իսկ գինեկոլոգները զննել 16:30-ին, պարոն Ղուկասյանը պատասխանեց. «Մերին մեզ մոտ եկել է արյունազեղման կասկածանքով, մեզ ասել են` գինեկոլոգիական խնդիր չունի, այդ պատճառով նախ նյարդաբանն է զննել, հետազոտություններ է անցել, որից հետո մենք ենք զննել նրան»:
Դատական նիստն այս վկայի հարցաքննությամբ ավարտվեց, հաջորդը նշանակվեց դեկտեմբերի 20-ին: Իսկ դատական նիստի վերջում դատավորը վկայից հետաքրքրվեց, թե նորմալ էր, որ Մերի Մարգարյանին վիրահատել են բժշկական կենտրոն ընդունվելուց երկու ժամ հետո, վկան պատասխանեց՝ ոչ:
Հիշեցնենք, որ ապացույցների համակցությամբ՝ մանկաբարձ-գինեկոլոգներ Շ. Բախշյանին և Ա. Բաբելյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասով: Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին:
Հիշեցնենք նաեւ, որ այս գործով դատարանում այսօր ցուցմունք են տվել Էրեբունի Բ/կ-ի եւս երկու աշխատակից:
Արփինե ՍԻՄՈՆՅԱՆ
