Մահացած ծննդկան Մերի Մարգարյանի գործով դատական նիստի ժամանակ այսօր ցուցմունք տվեց ծննդկանի կեսարյան վիրահատությանը մասնակցած «Էրեբունի» բժշկական կենտրոնի մանկաբարձ-գինեկոլոգ Էդիտա Ղարիբյանը:
Ըստ նրա, կեսարյան անելու անհրաժեշտությունն առաջացել էր ծննդկանի մոտ հայտնաբերված երկկողմանի թոքաբորբի պատճառով: Նրա խոսքով, Մերի Մարգարյանի հետազոտությունների արդյունքում հաստատվել էր նաեւ ՀԵԼԼՓ համախտանիշը:
«Վիրահատարանում ստացանք հետազոտության արդյունքները, որի համաձայն` տրոմբոցիտների նվազում կար եւ լյարդի ֆեգմենտների բարձրացում: Այդ ժամանակ արդեն ՀԵԼԼՓ համախտանիշը հաստատվեց, եւ սկսեցինք վիրահատությունը: Ինձ վերակենդանացման բաժանմունք են հրավիրել հուլիսի 27-ին, ժամը 16:00-ի սահմաններում: Մերիի վիճակը ծանր էր, կատարվել էին համապատասխան հետազոտությունները»,- Շենգավիթ վարչական շրջանի ընդհանուր իրավասության դատարանում պատմեց մանկաբարձ Ղարիբյանը:
Ինչու է Մերի Մարգարյանը հիվանդանոց ընդունվել ժամը 15:10-ին, իսկ գինեկոլոգները հրավիրվել են ժամը 16:00-ին հարցին, Էդիտա Ղարիբյանը չկարողացավ պատասխանել: Պաշտպանական կողմի մյուս հարցին, թե ինչու է վիրահատությունն արվել ժամը 17:15-ին, բժշկուհին կրկին չկարողացավ պատասխանել:
Կարդացեք նաև
Տիկին Ղարիբյանն ասաց, որ տարեկան ՀԵԼԼՓ համախտանիշով երկու-երեք դեպք է իրենց մոտ գրանցվում, բայց Մերի Մարգարյանի դեպքն աննախադեպ էր իր ելքով. «Նման ելքով իմ 19 տարվա աշխատանքային գործունեության ընթացքում առաջին անգամ է հանդիպել»:
Դատավորն էլ նկատեց, որ ըստ «Շենգավիթ» ԲԿ-ի մասնագետների` ՀԵԼԼՓ-ը ախտորոշվում է միայն մահից հետո, տիկին Ղարիբյանն էլ ասաց՝ այդ համախտանիշը տարբեր աստիճանի է լինում:
Հիշեցնենք, որ Մերի Մարգարյանի հարազատները կատարվածի մեջ մեղադրում են «Շենգավիթ» բժշկական կենտրոնի բժշկուհի Շուշանիկ Բախշյանին, որի մոտ էլ հաշվառված է եղել եւ 35 շաբաթ հետազոտվել է 26-ամյա կինը:
Դեպքի առթիվ հարուցվել է քրեական գործ` ՀՀ քրեական օրենսգրքի 130-րդ հոդվածի 2-րդ մասի հատկանիշներով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):
Արփինե ՍԻՄՈՆՅԱՆ
