Իրավապաշտպան Ավետիք Իշխանյանը մտահոգված է՝ Հայաստանում դատական սխալներն ընդհանրապես չեն ընդունվում:
«Ցանկացած քրեական գործերով արդարացումները հետագայում նոր երեւան եկած հանգամանքներով չեն գործում, իսկ ցմահ դատապարտյալների դեպքում՝ առավել եւս, չգրված օրենքով նրանց հարցերը տաբու են»,- այսօր «Դատական ճակատագրական սխալների ուղղման ամերիկյան փորձը» կլոր սեղան քննարկման ժամանակ ասաց Ավետիք Իշխանյանը:
Ըստ նրա, կարծես թե, Հայաստանում դատական սխալը չի էլ գործում. «Երբ որ նույնիսկ իշխանություններն են ընդունում, էլ չասեմ՝ միջազգային կազմակերպությունները, որ դատական համակարգը Հայաստանում բավականին մեծ բացեր ունի: Աշխարհում ընդհանրապես չկա իդեալական դատական համակարգ, բայց կան կայացած դատական համակարգեր: Այս տեսակետից ավելի կայացած դատական համակարգեր ունեցող երկրներում արդարացման որոշումները կազմում են 15-28 %, եւ նրանք ընդունում են իրենց դատական սխալները: ԱՄՆ-ի պես երկրում հազարավոր գործեր, երբ մարդկանց բավականին խիստ պատիժների են դատապարտել, հետագայում երեւան եկած հանգամանքներով կամ ԴՆԹ-ի թեստերով, արդարացվել են»:
Պարոն Իշխանյանի խոսքով, Հայաստանում մինչեւ հիմա դատավճռի օրինական ուժի մեջ մտնելուց հետո իրեղեն ապացույցները ոչնչացվել են, ինչը գործերի վերաբացման համար լուրջ խոչընդոտ է: Սակայն, նոր քրեական օրենսգիրքը կլուծի կարեւոր խնդիրը:
«Իրեղեն ապացույցները Հայաստանում շարունակում են ոչնչացնել, սակայն Քրեական դատավարության օրենսգրքի նոր նախագծի համաձայն իրեղեն ապացույցները չեն ոչնչացվելու եւ դրանք կպահպանվեն այնքան ժամանակ, որքան կենսաբանորեն հնարավոր է դրանք պահել»,- ասաց «Անմեղության հայկական ծրագրի» համակարգող, փորձագետ Զարուհի Մեջլումյանը:
Կարդացեք նաև
Փորձագիտական խումբն առաջարկում է Հայաստանում ձևավորել մարմին, որը կզբաղվի «ավարտված» քրեական գործերի ուսումնասիրմամբ, կունենա լիազորություն վերաբացման հիմքերի դեպքում եզրակացություն ներկայացնել բարձրագույն դատական ատյան:
Արփինե ՍԻՄՈՆՅԱՆ
