«Ընդդեմ իրավական կամայականությունների» հ/կ նախագահ Լարիսա Ալավերդյանի կարծիքով` ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտինը (Ֆրանսիա) և Ռիչարդ Հոգլանդն (ԱՄՆ) իրենց հայտարարությամբ` կապված դեկտեմբերի 29-ին Չինարի գյուղի մոտ տեղի ունեցած միջադեպի հետ, անուղղակի մասնակցում եւ ուղղակի քողարկում են ադրբեջանական դիվերսիան:
«Հայելի» ակումբում լրագրողների հետ հանդիպմանը տիկին Ալավերդյանը, անդրադառնալով ԵԱՀԿ Մինսկի խմբի համանախագահների հայտարարությանը, մտահոգություն հայտնեց. «Այդպիսի հայտարարությունները միայն ոգևորում են Ադրբեջանին դեպի նման վայրագ գործողություններ կատարելու համար: Դա անուղղակի մասնակցություն է, քողարկում ադրբեջանական դիվերսիայի»: Ըստ տիկին Ալավերդյանի` դա ոչ միայն Մինսկի խմբի համանախագահների խնդիրն է, այլ, նախ և առաջ, հայկական կողմը պետք է ավելի խորքային դիվանագիտական աշխատանք տանի, այլ ոչ թե օգտագործի դիվանագիտական այն տեխնիկաները, որոնք այժմ կիրառվում են»: Տիկին Ալավերդյանը հարց է բարձրացնում` իսկ ո՞ւր է սփյուռքն այս հարցում. «Չէ՞ որ որևէ հայտարարություն անելուց ուսումնասիրվում է ընդհանուր հասարակական տրամադրությունների դաշտը»: Ըստ տիկին Ալավերդյանի` քաղաքացիական հասարակության դաշտը բավականին պասիվ է: Նա մտահոգություն հայտնեց. «Դեկտեմբերի 29-ի հետ կապված քանի՞ նամակ է գնացել միջազգային ինստիտուտներ հայ հանրությունից։ Ոչ մի: Ցավոք, մենք կարծես թե սովորել ենք նրան, որ մեր հարևանն այդպիսին է, ու այդպես էլ պետք է լինի»:
Ըստ տիկին Ալավերդյանի` համանախագահների հայտարարությունից պարզ դարձավ, որ նրանք կարող են ինտերակտիվ ձևով հայտարարություն անել, որը մինչ այս չենք տեսել և, բոլոր դեպքերում, համանախագահներն ունեն այդ ունակությունը և իմպերատիվ ձևով բավականին կոշտ հայտարարությամբ կարող են հանդես գալ:
Տիկին Ալավերդյանը ցավով հիշեցնում է, որ որևէ նման հայտարարություն չեղավ այն ժամանակ, երբ ադրբեջանական կողմը հայերի գլուխներ էր կտրում եւ հրապարակում. «Գոնե այստեղ հավասարության նշանը դնեին: Պարզվում է, որ հումանիզմն ընկալվում է և ակնկալվում մեկ կողմից: Արդյոք նման անհամաչափ վերաբերմունքը նշանակո՞ւմ է, որ Ադրբեջանից հումանիզմի որեւէ դրսեւորում չեն սպասում։ Որքանո՞վ է նման անհամաչափ մոտեցումը նորմալ»։
Կարդացեք նաև
Տիկին Ալավերդյանի կարծիքով` կատարվածն ազդակ է, որ ակտիվացվի դիվանագիտական աշխատանքը, վաղուց անցել է դիվանագիտական դաշտում ռեվերանսներ անելու ժամանակը:
Տաթև ՀԱՐՈՒԹՅՈՒՆՅԱՆ
