Հայաստանում Եվրամիության պատվիրակության ղեկավար, դեսպան Պյոտր Սվիտալսկին պատասխանում է «Ազատության» հարցերին:
Հայաստանի և Եվրամիության միջև նոր համաձայնագրի շուրջ բանակցություններն ավարտական փուլում են, և առաջիկայում փաստաթուղթը կստորագրվի: Այսօր այս մասին «Ազատությանը» տեղեկացրեց Հայաստանում Եվրամիության պատվիրակության ղեկավար, դեսպան Պյոտր Սվիտալսկին:
«Բրյուսելից խումբ է գալիս, և այս շաբաթ Երևանում տեղի կունենա բանակցությունների հերթական փուլը: Սա ցույց է տալիս, որ երկու կողմերն էլ ունեն գործընթացն արագացնելու կամք: Տեսանելի է, որ բացառությամբ մի քանի հարցերի, որոնք դեռ բաց են, համաձայնագրի մնացած մասը հիմնականում պատրաստ է: Սրանք բանակցությունների վերջին ակորդներն են»,- մասնավորապես, ասաց Սվիտալսկին:
Նա չնշեց, թե որ հարցերի շուրջ դեռ համաձայնություն չի ձևավորվել, ընդգծելով, որ որոշ դեպքերում քաղաքական որոշում կայացնելու անհրաժեշտություն կա: Դեսպանը, սակայն, չմանրամասնեց՝ արդյո՞ք այդ որոշումը հայկական կողմը պետք է կայացնի: «Սա փոխադարձ համաձայնության գործընթաց է, որևէ մեկը չի խոսում միակողմանի զիջումների մասին: Կարծում եմ՝ ցանկացած բանակցության ժամանակ փոխհամաձայնությունը պահանջում է ճիշտ քայլեր երկու կողմից»,- ասաց ԵՄ դեսպանը:
Կարդացեք նաև
Պյոտր Սվիտալսկին նաև նշեց, որ համաձայնագիրը ամբողջական տեսքի բերելու ժամկետներն ավելի հստակ կլինեն բանակցությունների վերջնական փուլից հետո: Այդուհանդերձ, դեսպանն ընդգծեց՝ Հայաստանի փոխարտգործնախարարի վերջերս արած հայտարարությունն այն մասին, որ նոր փաստաթուղթը ստորագրվելու է 2017-ի առաջին երեք ամիսներին՝ «հեռու չէ իրականությունից»:
Նյութի մանրամասները կարդացեք սկզբնաղբյուր կայքում
