«Համերաշխություն» կուսակցությունն այս օրերին նույնպես ակտիվ բանակցում է առաջիկա խորհրդարանական ընտրություններին մասնակցելու հայտ ներկայացրած քաղաքական ուժերի ու դաշինքների հետ: Կուսակցության նախագահ Սարգիս Ավետիսյանը չհստակեցրեց, թե որ ուժերի հետ են բանակցում, միայն ասաց՝ բոլոր ուժերի հետ բացի ՀՀԿ-ից ու «Ելք» դաշինքից:
Գուցե հենց բանակցություններով պայմանավորված էլ պարոն Ավետիսյանը խուսափեց կոշտ գնահատականներից՝ բացառությամբ ՀՀԿ-ի. «ՀՀԿ-ի հետ հիմա չենք բանակցել, որովհետեւ իմաստ չկա բանակցելու, ինչ բանակցենք: Ամեն ինչ պարզ է, այս ժամանակահատվածում սպառեցին իրենց բոլոր ռեսուրսները, ճիշտ կլինի, որ իրենք թողնեն ասպարեզը, որովհետեւ դա վտանգում է արդեն երկրին: Եթե դու վերջացել ես, չկաս, չես կարող ասել՝ չէ գիտեք, ես կամ: Արդեն վերջացել ես, ինչպես ժամանակին ՀՀՇ-ի դեպքում էր, որ Լեւոն Տեր-Պետրոսյանը պահեց իշխանությունը, հետո հասկացավ, որ էլ չի լինում պահել, տվեցին իշխանությունը, գնացին: Հիմա նույնը ՀՀԿ-ն պետք է անի, պետք է սովորենք փոխվել, ոչ թե մտածենք ՝հենց նստեցինք այդ աթոռին, այդ աթոռը մերն է, վե՛րջ: Մարդկանց հենց այդ աթոռից հանում ես, ինֆարկտ են ստանում»:
Պարոն Ավետիսյանը կարծիք հայտնեց, որ խորհրդարան կանցնեն այն ուժերը, որոնք ռեսուրսներ ունեն. «Ովքեր շատ ունեն, շատ կանցնեն, ովքեր քիչ ունեն, քիչ կանցնեն»:
Նա ապագա խորհրդարանում տեսնում է ՀՀԿ-ին, Ծառուկյան եւ Վարդան Օսկանյան- Սեյրան Օհանյան դաշինքներին. «Այս ընտրությունները գաղափարական ընտրություններ չեն, անհատների միջեւ ընտրություններ են, պետք է ընտրենք անհատներին, իսկ նրանց միջեւ գաղափարական տարբերություն չկա»:
Կարդացեք նաև
Մեր հարցին՝ իրակա՞ն է համարում իշխանությունների դեմ պայքարող նախկին պաշտոնյաների պայքարը, պարոն Ավետիսյանը պատասխանեց՝ այո. «Ցավում եմ, բայց, իսկապես, այդպես է: Եթե խնդիրը դնում ենք անհատների վրա, ապա Սերժ Սարգսյանը Հովիկ Աբրահամյանի հարազատ եղբայրը չէ, ոչ էլ Գագիկ Ծառուկյանն է նրանց հարազատ եղբայրը, հետեւաբար, եթե խնդիրներ ունեն իրար հետ, իրարից նեղացած են, կամ այլ ձեւ են պատկերացնում պայքարը, կարող են այլ տեղերով շարժվել առաջ: Ուզում եմ, որ մենք հասկանանք, որ Հայաստանում դա շատ հնարավոր է, որովհետեւ չկա դասական իմաստով քաղաքական պայքար, կա անհատների միջեւ պայքար…չգիտեմ՝ Հովիկ Աբրահամյանի խնդիրը պաշտոնի կռի՞վն է, թե՞ վերաբերմունքի հարց էր, բայց դա էակա՞ն է, որ: Էականն այն է, որ այսօր կա իշխանություն եւ Հովիկ Աբրահամյան, որ իրար դեմ պայքարում են»:
«Համերաշխություն» կուսակցությունն առաջիկա օրերին կհայտարարի, թե որ ուժին կամ դաշինքին է միանում ընտրություններին:
Արփինե ՍԻՄՈՆՅԱՆ
