Կառավարության մարտի 16-ի նիստի օրակարգում է ներառված «Որոտանի» ՀԷԿ-երի համալիրի մասին որոշման նախագիծ: Ըստ այս որոշման, նախատեսվում է՝ ««Որոտանի հիդրոէլեկտրակայանների համալիր» ՓԲԸ –ի կողմից նախորդ տարիների գործունեության արդյունքներով կուտակված շահույթի հաշվին 100% բաժնետոմսերի դիմաց ՀՀ-ին վճարել 7,3 միլիարդ դրամ շահութաբաժին՝ վճարումը կատարելով ընկերությանը սեփականության իրավունքով պատկանող՝ «Նաիրիտ-2» ՓԲԸ –ի 7, 3 միլիարդ դրամ բաժնեմասով` 732081 հատ հասարակ (սովորական) բաժնետոմսերով, յուրաքանչյուրը՝ 10 հազար դրամ անվանական արժեքով:
Ընկերության գույքային համալիրի հիմնական մասը օտարվել է ամերիկյան «Քոնթուր Գլոբալ ՀիդրոԿասկադ» ՓԲԸ-ին, եւ ինչպես որոշման նախագծում է նշված, «Հեր-Հեր» հիդրոէլեկտրակայանն էլ օտարվել է պաշտպանության նախարարության ենթակայության «Արմ-Աէրո» ՓԲԸ-ին: «Ընկերությունը գործունեություն չի իրականացնում եւ նրա հաշվեկշռում որեւէ գույք չի հաշվառվում: Ընկերությունը նախորդ տարիների գործունեության արդյունքներով ունի 49,7 միլիարդ դրամ կուտակված շահույթ»,-գրված է նախագծում:
Ըստ էության, այս որոշման նախագծի համաձայն, ինչպես Aravot.am-ին պարզաբանեցին էներգետիկ ենթակառուցվածքների եւ բնական պաշարների նախարարությունից, «Որոտան ՀԷԿ-երի համալիր» ընկերությունը լուծարվում է: Նախարարության պարզաբանման համաձայն, «Հաշվի առնելով, որ «Որոտանի հիդրոէլեկտրակայանների համալիր ՓԲԸ –ն գնում է լուծարման, նրա կազմում գտնվող «Նաիրիտ 2» ՓԲԸ-ի կառավարման լիազորությունները փոխանցվում են նախարարությանը:
Նելլի ԲԱԲԱՅԱՆ
