«Ընդդեմ իրավական կամայականության» ՀԿ նախագահ Լարիսա Ալավերդյանը կարծում է՝ Հայաստանը չի կարողանում միջազգային հարթակներում ներկայանալ սեփական շահերով:
«Պատահական չէ, որ այսօր բանակցություններ չեն կայանում: Սա տագնապ է առաջացնում: Ադրբեջանի ու Թուրքիայի համար կա զուտ հայության խնդիր: Ապրիլյան պատերազմը վկայությունն է, որ քաղաքական էլիտայի վրա հույսներս դնելով՝ չենք հասնելու լինել-չլինելու խնդրի հաղթանակի: Մեր ո՛չ դիվանագիտական, ո՛չ էլ քաղաքական ուժերն այդպես էլ արժանի չեղան հայ ժողովրդի ներուժին»,- այսօր «Փաստարկ» ակումբում ասաց Լարիսա Ալավերդյանը:
Նրա խոսքով, բանակցային սեղանին նոր ոչինչ չկա, մինչդեռ հայկական կողմն ինքը պետք է օրակարգ թելադրի. «Նախևառաջ Ադրբեջանին պետք է քաղաքական դաշտ բերել և կան նորմեր, որոնց նա պետք է ենթարկվի»:
Անդրադառնալով մայիսի 1-ից մեկնարկած թուրք-ադրբեջանական զորավարժություններին՝ տիկին Ալավերդյանը կարծիք հայտնեց, որ Ադրբեջանն այդկերպ ինքն իրեն է ստուգում, վարժում մկանները՝ պարզելու՝ կարո՞ղ է իրական պատերազմ սկսել: Իսկ ինչ վերաբերում է Նախիջևանում թուրքական ռազմաբազայի տեղակայման հնարավորությանը, բանախոսը իրատեսական հեռանկար է տեսնում:
«Քանի որ խորհրդային միությունից հետո Հայաստանը չբարձրացրեց Նախիջևանի հարցը, այնինչ Նախիջևանի հարցն ավելի պատրաստ էր միջազգային ատյաններում քննարկելու համար, քան արցախյան հարցը: Հայկական կողմը ոչ միայն դա չարեց, այլ թեման փակվեց»:
Կարդացեք նաև
Ըստ Լարիսա Ալավերդյանի, Թուրքիան, Ռուսաստանի հետ ինչ-ինչ շահեր ունենալով, ցանկանում է տարածաշրջանում դառնալ ամենակարևոր գործոնը և լինել լիդեր:
Արփինե ՍԻՄՈՆՅԱՆ
