«Նա հավաստել է իր պատրաստակամությունը, արդյունքը սպասեցնել չտվեց: Նա Թուրքիայի իշխանությունների առաջ աշխատանք ստանձնեց, որպեսզի տեղապահն ընդունելություն գտնի իշխանությունների կողմից»,- Մայր Աթոռում այսօր լրագրողների հետ հանդիպմանն անդրադառնալով Պոլսի հայոց պատրիարքի նախկին փոխանորդ Տ. Արամ արքեպիսկոպոս Աթեշյանի հրաժարականին, ասաց Մայր Աթոռի դիվանապետ Տ. Արշակ եպիսկոպոս Խաչատրյանը:
Նա խոսեց Արամ սրբազանի՝ վերջերս Թուրքիայի իշխանություններին ուղղված նամակի մասին, ըստ որի՝ պատրիարքական ընտրությունների կազմակերպումն իրավական առումով հնարավոր չէ: «Թուրքիայի իշխանությունների կեցվածքը փոխվել է, նրանք ճանաչել են տեղապահ Գարեգին սրբազանին, որի լիազորությունների մեջ է ընտրությունների կազմակերպումը»,-նկատեց Արշակ սրբազանը:
Հարցին, թե Տ. Արամ արք. Աթեշյանն ի վերջո Մայր Աթոռին բացատրություն տվե՞ց իր հրաժարականի մասին, նա այսպես արձագանքեց. «Նա դժվար ընտրության առջեւ է կանգնած եղել եւ ծանր դրության մեջ է եղել: Փառք Աստծո, որ ամեն ինչ լավ անցավ»:
Հիշեցնենք, որ Պոլսի հայոց պատրիարքի ընտրությունների կազմակերպման ժամկետներն առաջիկայում կորոշվեն:
Մանրամասն քիչ ուշ՝ տեսանյութում:
Լուիզա ՍՈՒՔԻԱՍՅԱՆ
