«Ինչո՞ւ Գեւորգյան հոգեւոր ճեմարանի սաները չեն ծառայում եւ չեն ենթարկվում այլընտրանքային ծառայության». Իշխանյան (Տեսանյութ)

Իրավապաշտպան կազմակերպությունների փորձագետներն այսօր կազմակերպված քննարկման ժամանակ ՀՀ արդարադատության նախարարության ներկայացրած՝ «Խղճի ազատության եւ կրոնական կազմակերպությունների մասին» ՀՀ օրենքի նախագծում հիմնականում թերացումներ մատնանշեցին: Նրանք կարծում են, որ օրենքի նախագիծը սահմանափակում է կրոնական կառույցների գործունեությունը:

«Համագործակցություն հանուն  ժողովրդավարության» կենտրոնի նախագահ Ստեփան Դանիելյանը համոզված է՝ օրենքի նախագիծն ավելի վտանգավոր է նախորդ նախագծերից: «Այն չի վերաբերում Հայ առաքելական եկեղեցուն»:

Դանիելյանը նկատեց, որ Սահմանադրությամբ, օրինակ,  սպաներին արգելվում է լինել կրոնական կազմակերպությունների անդամ. «Ֆաշիստական Գերմանիայում անգամ նման սահմանափակում չի եղել»: Ստեփան Դանիելյանի համոզմամբ՝ այսպես օրենքի առաջ հավասար լինելու հանգամանքն արդեն իսկ ոտնահարվում է. «Առաքելական եկեղեցին երեխային իրավունք ունի կրոնական քարոզ կարդալու, մինչդեռ կրոնական կառույցներին արգելվում է մինչեւ 14 տարեկաններին քարոզել՝ առանց ծնողների իմացության եւ թույլտվության»:

Իրավապաշտպան Ավետիք Իշխանյանն էլ իր հերթին նկատեց, որ Գեւորգյան հոգեւոր ճեմարանի սաները չեն ծառայում եւ չեն ենթարկվում նաեւ այլընտրանքային ծառայությանը. «Ինչո՞ւ է այդպես: Իսկ այլընտրանքային ծառայությունը վերաբերելո՞ւ է Գեւորգյան հոգեւոր ճեմարանի սաներին… Սա խտրական վերաբերմունք է կրոնական կառույցների հանդեպ: Յոթ մենաշնորհները, միեւնույն է, մնալու են Առաքելական եկեղեցուն: Հարգում եմ մարդկանց կրոնական համոզմունքները, բայց մի մտեք պետություն, դպրոց եւ քարոզեք»:

Իշխանյանի խոսքով՝ օրենքի նախագիծը չի տարածվում Հայ առաքելական եկեղեցու վրա. «Խորամանկություն է… եթե այն չի վերաբերում Առաքելական եկեղեցուն, ուրեմն ուղղակի խտրական վերաբերմունք է: Հիմա Հայ Առաքելական եկեղեցին կրո՞ն է, թե կրոն չէ»:

Ներկաները նաեւ դժգոհեցին, որ նրանք, ովքեր Հայ առաքելական եկեղեցու անդամներ չեն, աղանդավորներ են որակվում: «Դա վիրավորական եւ խտրական բառ է: Դրա համար կարելի է դատի տալ: Դա նույն բանն է, թե ՌԴ-ում հայերին ասեն՝ «չեռնոմազիյ»,-ասաց Իշխանյանը:

Թեմայի շուրջ այլ մանրամասները՝ տեսանյութում:

Լուիզա ՍՈՒՔԻԱՍՅԱՆ