Աշխատանքի եւ սոցիալական հարցերի նախարար Արտեմ Ասատրյանն այսօր ԱԺ-ում ներկայացրեց 2016-ի բյուջեի կատարման հաշվետվությունը:
«Ելքի» պատգամավոր Գեւորգ Գորգիսյանը հարցրեց կուտակային կենսաթոշակներից եւ ավանդներից. «Կուտակային կենսաթոշակների հարցը, երբ քննարկվում էր, թե ինչու է մեզ պետք, խոսվում էր երկրի բյուջեում, տնտեսության մեջ ներդրումների մասին: Պետությունը ինչ գումար է ներդրել այս համակարգում եւ ինչքան գումար է ծախսվել: Տարեցների հետ կապված նշեցիք, որ ավանդների փոխհատուցում է ստացել 8000 մարդ, ո՞ր տարիքային շեմն է ստացել, որովհետեւ 90-նն անց մարդիկ են դիմել, նրանց խնդրել են մեկուկես տարի սպասել: Նրանք վախենում են, որ այդքան չեն ապրի ուղղակի:
Նախարարը կուտակային կենսաթոշակների հետ կապված պատասխանեց, որ 60 մլրդ դրամից ավելի միջոցներ են այսօր կառավարվում ակտիվները կառավարող ընկերությունների կողմից: Թե ինչ արդյունք են տվել, դրան ավելի մասնագիտական պատասխան կտրամադրեն ԿԲ-ից, ֆիննախից: Եթե մենք գործ ունենք այսօր տոկոսադրույքի որոշակի իջեցման հետ, մատչելիության հետ, վստահ եմ, որ նաեւ այդ միջոցներն են իրենց ազդեցությունն ունեցել, որովհետեւ դրանք երկար փողեր են»:
Ավանդատունների հետ կապված նախարարը պատասխանեց, որ 2016-ին 3472 տարեց է ստացել փոխհատուցումը, բայց միջոցների մեծ մասը ծախսվում է տարեցներին, 40 տոկոսը՝ սահմանամերձ բնակավայրերի բնակիչներին, 10 տոկոսը՝ ազատամարտիկներին: Նախարարն ասաց, որ այս տարվա վերջում կունենան մի վիճակ, որ ներկայումս հաշվառված բոլոր անձինք իրենց ավանդի դիմաց փոխհատուցումները կստանան եւ հնարավորություն կունենան ծրագրի շարունակականությունը այնպես ապահովել, որ քաղաքացիները այդքան չսպասեն:
Հռիփսիմե ՋԵԲԵՋՅԱՆ
