Այսօր ԱԺ արտաքին հարաբերությունների հանձնաժողովի նախագահ Արմեն Աշոտյանը, ԱԺ նիստում խոսելով հեռուստառադիոընկերությունների եթերի որակի մասին, կրթական մակարդակի մասին, ասաց, որ միայն մի սենյակում չի կարող մարդն իրեն լավ զգալ, զով զգալ, եթե մյուս սենյակներում տոթ է: Ջերմաստիճանը պետք է լինի նույնը ընտանիքում, դպրոցում, հեռուստատեսության մեջ, համակարգչում: Մարդը դուրս է գալու տնից փողոց՝ հանդիպի այլ իրականությանը. «Սովետական համակարգը դրանով էր լավ՝ այդ ջերմային ռեժիմը նույնն էր ամեն տեղ: Իհարկե, իրենք մտցնում էին տակը նաեւ գաղափարներ»:
Արմեն Աշոտյանի դիտարկմամբ՝ միայն հեռուստատեսային էկրանում պոռնոգրաֆիայի պարունակությունը ստուգելը ոչինչ չի տալու, համացանցային բովանդակությունն էլ պետք է ստուգվի: Նա առաջարկեց, որ ոլորտային հանձնաժողովը մտածի եւ հեռուստատեսության եւ ռադիոյի ազգային հանձնաժողովին նոր գործիքակազմ տա, որ կարողանա վերահսկել նաեւ համացանցը:
Աշոտյանը նաեւ քննադատեց, որ հեռուստատեսությունները լավ ֆիլմերի դուրս գալուց մի ամիս հետո ցուցադրում են դրանք, ուրախանում ես, բայց գիտես՝ գողացած են:
Աշոտյանը ՀՌԱՀ-ին առաջարկեց՝ պատժեք այն հեռուստաընկերություններին, որոնք գովազդի ձայնը 4 անգամ ուժեղացնում են. «Իրականում ոչ միայն տհաճ է, դա երբեմն մեր տներում բերում է անախորժ վիճակների, երբ երեխա է քնած լինում: Խնդրում եմ, այդ տարրական բաներին հետեւեք, որ չանեն»:
Ըստ պարոն Աշոտյանի, հասարակությունը ուտում է սկանդալային պատմությունները, ԱԺ-ի քննարկումներից որեւէ լուրջ ելույթ ավելի քիչ դիտում է ունենում, քան 18+-երը:
Հռիփսիմե ՋԵԲԵՋՅԱՆ
