Անցյալ տարի գլխավոր դատախազ Արթուր Դավթյանը հանդիպել է խաղաղ պայմաններում զոհված զինծառայողների ծնողների հետ, որոնք պահանջում են բացահայտել իրենց որդիների մահվան իրական մեղավորներին:
Այսօր ԱԺ-ում «Ելքի» պատգամավոր Լենա Նազարյանը Արթուր Դավթյանին հարցրեց՝ ի՞նչ եղավ այդ հանդիպման արդյունքում: Արթուր Դավթյանն ասաց, որ քրգործեր կան, 10 տարվա վաղեմություն ունեն, եւ դատական վճիռների վերանայման սահմանափակ մեխանիզմներ են գործում այսօր: Ծնողներին առաջարկվել է ներկայացնել հիմքեր, որոնք օրենքով հնարավորություն կտա արդյունք ունենալու: Մեկ քրգործով վարույթը կասեցված էր, վերսկսել է:
Նա նաեւ հարցրեց՝ քրեակատարողական հիմնարկներ եք ստուգել եւ 1 պետ ազատվել է աշխատանքից, խոսքը «Նուբարաշեն» ՔԿՀ-ի պետ Ռուբիկ Ստեփանյանի մասին է, նրա դեմ նաեւ քրգործ է հարուցվել՝ պաշտոնական դիրքի չարաշահման համար: Բայց գործը կարճվել է, սխալ չարաշահում էիք հայտնաբերվել, թե՞ նրան ներվել է:
Արթուր Դավթյանը պատասխանեց. «Քրեական պատասխանատվության ենթարկելը եւ կարգապահական պատասխանատվության ենթարկելը տարբեր հիմքեր ունեն: Այո, նրա կողմից առկա է եղել վարչական իրավախախտում, որը առիթ է հանդիսացել նրա վերադասի կողմից նրան պաշտոնից ազատել: Բայց համապատասխան հիմքեր, որոնք կվկայեն նրա կողմից հանցագործության կատարման մասին քրգործով ձեռք չեն բերվել»:
Լենա Նազարյանը նաեւ հարցրեց Մարտի 1-ի գործից, ի՞նչ զարգացումներ կան: Արթուր Դավթյանը պատասխանեց, որ գործն ընթացքի մեջ են, նախաքննությունը շարունակվում է, աշխատում են բացահայտման, անձանց մեղադրանքը հիմնավորելու ուղղությամբ ապացույցներ ձեռք բերելու ուղղությամբ:
Հռիփսիմե ՋԵԲԵՋՅԱՆ