«ԼԳՊՏ համայնքը չերեւացող հասարակություն է, լեգիտիմացված չեն քո հույզերը, ընդունված չեն»

«Լսիր ինձ» ֆիլմը , որն արգելվեց ցուցադրվել «Ոսկե ծիրան» միջազգային կինոփառատոնում, այսօր ցուցադրվում էր «Մեդիա կենտրոնում»: Այս փաստավավերագրական ֆիլմի ցուցադրումից առաջ «Փինք Արմենիա» ՀԿ-ի անդամ, «Լսիր ինձ» ֆիլմի սցենարիստ Հովհաննես Իշխանյանն ասաց, որ սկզբում հանդիպել են ԼԳԲՏ համայնքի ներկայացուցիչների հետ, եւ նախքան այդ էլ տարակուսում էին, կարծում, որ  դժվար թե հայտնվեն մարդիկ, որոնք կհամաձայնվեն բաց դեմքով տեսախցիկի առջեւ խոսել՝ հաշվի առնելով, թե՝ ինչ կարծիքներ կան հասարակությունում. «Հետո խոսելիս մենք եկանք եզրահանգման, որ ֆիլմն այնպիսին պետք է լինի, որպեսզի մարդիկ տեսնեն ու լսեն, թե ովքեր են այդ մարդիկ, որոնց շատերը չեն ընդունում, ատում են»:

Հիշեցնենք, ըստ  «Փինք Արմենիա» հ/կ-ի հայտարարության,  14-րդ «Ոսկե Ծիրան» միջազգային կինոփառատոնի «Հայացք ներսից եւ դրսից» արտամրցութային ծրագրում ընդգրկվել էին ԼԳԲՏ թեմայով 2 ֆիլմ՝ «Լսիր ինձ․ չպատմված պատմություններ ատելությունից անդին» վավերագրությունը եւ «Ծիրանի այգիներ» գեղարվեստական ֆիլմը։ Սակայն Կինեմատոգրաֆիստների միությունը որոշեց հանել ֆիլմերը ծրագրից եւ չցուցադրել:

«ԼԳՊՏ համայնքը չերեւացող հասարակություն է, որովհետեւ, սկսած հուզական ապրումներից՝ լեգիտիմացված չեն քո հույզերը, ընդունված չեն քո հույզերը, վերջացրած անձնական կյանքից: Միայն այն, որ մենք ուրախանում ենք, որ ինչ-որ մեկն ագրեսիվ կոչեր չի անում մեր նկատմամբ, երբ մենք ինչ-որ տեղ ենք հայտնվում, սա արդեն զավեշտալի է, ինձ համար ծիծաղելի է իրավիճակը»-ասում է ֆիլմի հերոսներից մեկը:

ԼԳՊՏ համայնքի մասին փաստավավերագրական այս ֆիլմում համայնքի  10 ներկայացուցիչ պատմում են իրենց կյանքի մասին,  ընտանիքի հետ հարաբերությունների մասին,  իրենց հանդեպ հասարակության վերաբերմունքի մասին, եւ սա, ինչպես համայքնի ներկայացուցիչներն են ասում, ֆիլմ է հանդուրժողականության եւ իրավունքների հավասարության մասին:

Նելլի ԲԱԲԱՅԱՆ