2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 14-ի գործով դատական նիստն այսօր վերսկսվելուն պես դատավոր Արտուշ Գաբրիելյանը որոշեց սանկցիա կիրառել ամբաստանյալների պաշտպաններից Հրանտ Գեւորգյանի, Հարություն Բաղդասարյանի, նաեւ՝ Հայկ Ալումյանի հանդեպ: Դատարանը նրանց պատասխանատվության ենթարկելու մասին գրությամբ կդիմի ՀՀ փաստաբանների պալատին:
Պաշտպանները միջնորդեցին նիստերի դահլիճ վերադարձնել ամբաստանյալներից Արայիկ Խանդոյանին եւ Գագիկ Եղիազարյանին, որոնք 10 ժամով հեռացվել են նիստերից: Դատավորն ասաց, որ այդ միջնորդությունները կքննարկեն հաջորդ նիստում: Ամբաստանյալ Սմբատ Բարսեղյանի համար էլ, որի պաշտպանը Հայկ Ալումյանն էր, հանրային պաշտպան կներգրավվի:
Նիստը հետաձգվեց եւ նշանակվեց հաջորդ չորեքշաբթի՝ ժամը 11-ին:
Լուիզա ՍՈՒՔԻԱՍՅԱՆ
