Տավուշի մարզի Նոյեմբերյանի տարածաշրջանի սահմանամերձ Կոթի գյուղի բնակիչ Յուրիկ Բենիկի Սեփխանյանին մեղադրանք է առաջադրվել այն բանի համար, որ նա առանց իրացնելու նպատակի, իր անձնական օգտագործման համար, Կոթի գյուղում գտնվող իր հայրական տան բակից հավաքել, մանրացրել է կանեփի թուփ, որից պատրաստել եւ ապօրինի պահել է 1.3 գրամ հաստատուն քաշով մարիխուանա տեսակի թմրամիջոց:
Նրան մեղադրանք է առաջադրվել ՀՀ քրեական օրենսգրքի 268 հոդվածի 1-ին մասով(« Առանց իրացնելու նպատակի զգալի չափերով թմրամիջոցներ կամ հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը կամ առաքելը»): Սույն հոդվածը նախատեսում է առավելագույնը 2 ամիս ժամկետով կալանք կամ առավելագույնը 1 տարի ժամկետով ազատազրկում:
Իրավապահներից ստացված տեղեկություններով՝ քրեական գործով նշանակված փորձաքննության եզրակացությամբ՝ Յու. Սեփխանյանը անմեղսունակ է: Վերջինիս նկատմամբ խափանման միջոց է ընտրվել հսկողությանը հանձնելը: Տավուշի մարզի առաջին ատյանի դատարանը, ամենայն հավանականությամբ, նրա նկատմամբ բժշկական բնույթի հարկադրանքի միջոց կկիրառի:
Յու. Սեփխանյանի դատավարությունը Տավուշի մարզի առաջին ատյանի դատարանի Բերդի նստավայրում նշանակված է վաղը՝ սեպտեմբերի 5-ին:
Ոսկան ՍԱՐԳՍՅԱՆ
