Էշը ոչ միայն ապարանյան անեկդոտներում է հիշատակվում, այլեւ հունական Լինդոս քաղաքի սիրելի խորհրդանիշն է: Այստեղ վաճառվող ամեն ինչի վրա իշուկներ են նկարված: Հուշանվերները եւս «իշուկային» են: Ընդ որում, էշը ոչ միայն հուշանվեր է, այլեւ փոխադրամիջոց: Լինդոսում են գտնվում Հռոդոսյան Ակրոպոլիսի ավերակները, որտեղ մշտապես մարդկանց բազմություն կա: Լինդոսը կոլորիտային, ձյունաճերմակ քաղաք է:
Լինդոսյան տաքսին էլ յուրահատուկ է, այստեղից Ակրոպոլիս կարելի է բարձրանալ էշերով: Եվ այդ փոխադրամիջոցն արժե 5 եվրո: Ընդ որում, էշը երբեք մենակ տեղից չի շարժվում. լինդոսյան էշերի մոտ սովորություն է զույգերով Ակրոպոլիս բարձրանալը: Եվ այնպես չէ, որ ամեն ոք կարող է էշ-տաքսիով երթեւեկել: Գիրուկներին չեն թույլատրում նստել այդ կենդանիների վրա, ծանրքաշայինները ստիպված են բարձունքը ոտքով հաղթահարել:
Լուսանկարը` Գոհար ՀԱԿՈԲՅԱՆԻ
«Առավոտ»
05.09.2017
