Երևանի ավագանու Կրթության, մշակույթի և սոցիալական հարցերի մշտական հանձնաժողովը ձայների մեծամասնությամբ բացասական եզրակացություն է տվել «Ելք» խմբակցության անդամների կողմից առաջարկված փողոցների անվանակոչության նախագծերին։
Գրականագետ Ազատ Եղիազարյանը սեպտեմբերի 6-ին «Հենարան» ակումբում խոսելով այդ թեմայով, ասաց, որ հանձնաժողովի կտրուկ մոտեցումը անսպասելի էր: Նրա ձեւակերպմամբ. «Մի պահ թվաց, թե Հայաստանը ուրիշ դարդ ու ցավ չունի, բացի փողոցների անվանափոխությունից, այնինչ կարծում եմ, որ այդ խնդիրն այդքան կարեւոր խնդիր չէ, դա կարելի է անել առանց քարոզչական արշավի` աշխատանքային կարգով: Այ, Լեոնիդ Ազգալդյանի անունով փողոց անպայման պետք է լինի, նույնիսկ պետք է դպրոց անվանակոչել, բայց կարիք չկա Լենինգրադյանի անունը մեջտեղ բերել:
Հիշո՞ւմ եք, թե ինչպես սկսվեց այս ամենը: Դա սկսվեց Թումանյանի թանգարանի աստիճաններին բացված ցուցահանդեսից, ցուցահանդես բացվեց` ապացուցելու համար, որ մեր պատմության մեջ գործած ուժերից ոմանք տականքներ են: Արդյոք այսօր այս պահի մեջ պե՞տք էր այս ամենը… Թումանյանի թանգարանից սկսել այդպիսի մի արշավ, որ հայ ժողովրդի երկու մասերին հանել իրար դեմ, ինձ համար տարակուսելի է: Այսօր ուրիշ շատ խնդիրներ ունենք…
Ինչ վերաբերում է «Ելքին», մի՞թե իրեն ընդդիմադիր հռչակած քաղաքական ուժը պետք է սկսեր փողոցների անվանափոխությունից»:
Գոհար ՀԱԿՈԲՅԱՆ
