«Ադրբեջանին թվում էր, թե Վիեննայի եւ Սանկտ Պետերբուրգի պայմանավորվածությունները կարող է նետել աղբարկղը, բայց ԵԱՀԿ-Ադրբեջան բացատրություններից հետո ստիպված եղավ թեկուզ ձեւական, բայց համաձայնել, որ այդ կետն իրականանա»,- «Առավոտ»-ի հետ զրույցում անդրադառնալով այն փաստին, որ վերջերս Կրակովում ՀՀ եւ Ադրբեջանի արտգործնախարարների հանդիպմանը պայմանավորվածություն է ձեռք բերվել յոթ հոգով ավելացնել Արցախյան հակամարտության շփման գոտում ԵԱՀԿ մշտադիտարկողների թիվը, ասաց քաղաքագետ Ստյոպա Սաֆարյանը: «Ադրբեջանը դիմադրությունից հետո վերջապես համաձայնեց, ինչը, բնականաբար, նրա սրտով չէ»,- նկատեց նա:
Խոսելով Ռուսաստանի կողմից Ադրբեջանին զինտեխնիկայի հերթական խմբաքանակի մատակարարման մասին՝ Ստյոպա Սաֆարյանը համոզմունք հայտնեց, որ դա Ադրբեջանի կողմից ընկալվում է որպես ուղերձ՝ հրադադարի ռեժիմի խախտում թույլ տալու համար. «Ռուսաստանը ձգտում է պահպանել իր զգալի եւ բացառիկ ազդեցությունը հակամարտության կողմերի վրա: Ալիեւն էլ իր հերթին հասկանում է, որ ոչ ռազմական, ոչ էլ քաղաքական կարգավորման միջոցով ունակ չէ իր հասարակությանը տալ այն, ինչ խոստացել է, այսինքն՝ տալ ամբողջը»:
ԼՈՒԻԶԱ ՍՈՒՔԻԱՍՅԱՆ
«Առավոտ»
01.02.2018
