Այսօր Գյումրու Տեքստիլագործների թաղամասում, որտեղ գտնվում են Օյունջյան դպրոց-վարժարանը, «Վարդուհի» արվեստի դպրոցն ու «Աղավնի» արհեստի կենտրոնը, տեղի ունեցավ համերգասրահի հիմնարկեքի հանդիսավոր արարողությունը։ Գյումրիին ֆիլհարմոնիայի դահլիճ նվիրողն ամերիկահայ բժիշկ Հովհաննես Օյունջյանն է, որն իր ողջ կարողությունը ներդրել է Գյումրիի զարգացման համար․ երկրաշարժից հետո կառուցելով վերոնշյալ դպրոցներն ու արհեստի կենտրոնը՝ դրանք կրում են իր ծնողների ու երկու քույրերի անունները։
Այսօր բժշկի ծննդյան տոնն է: Տեսարանը հուզիչ էր․ Հովհաննես Օյունջյանը՝ Հայոց եռագույնն ու անմոռուկը կրծքին խփած ու սայլակին նստած, եկել էր իր ձեռքով ֆիլհարմոնիայի դահլիճի առաջին քարը դնելու։
Մասնակիցներն, իհարկե, շատ տխրեցին՝ տեսնելով, որ նա վատառողջ է։ Գյումրու քաղաքապետ Սամվել Բալասանյանն ասաց, որ գոհունակությունն արտահայտելու խոսքեր չի գտնում ասելու այս մեծ մարդուն, բարերարին, որը ԱՄՆ-ում վարկեր վերցնելով՝ բերում է Գյումրի, որպեսզի բարեգործություն անի։
Կարդացեք նաև
«Մի օր հարցրեցի, դոկտոր, ո՞նց որ եկար Գյումրի, ի՞նչն է պատճառը, որ սկսեցիր այսպիսի շենքեր կառուցել, ասաց՝ սրանով ես ուղղակի հպարտանում եմ և հանգստանում»,-պատմեց Սամվել Բալասանյանը։
Շիրակի մարզպետ Կարեն Սարուխանյանն էլ, հատ հատ թվարկելով բժիշկ Օյունջյանի բարեգործությունները Գյումրիում ու նրան առանձնահատուկ շնորհակալություն հայտնելով, ասաց․«Ունենալ նման հրաշք կառույցներ, նշանակում է ջանք ու եռանդ չխնայել այս կրթօջախներում պատրաստելու Նոր Հայաստանին արժանի, գրագետ, բանիմաց հայորդիներ»։
Բժիշկ Օյունջյանին միայն ու միայն քաջ առողջություն մաղթեցին։
«Օյունջյան» հիմնադրամի տնօրեն պարոն Լաճիկյանն էլ նշեց, որ ԱՄՆ-ում բժիշկներն արգելել էին Հովհաննես Օյունջյանին ինքնաթիռ նստել, սակայն նա որոշել էր իր ծննդյան օրը նվեր մատուցել գյումրեցիներին։
«Ուզում եմ նոր շենք կառուցել նոր Հայաստանում, կուզեմ ապրել այնքան, որ նոր բեմի վրա տեսնեմ մեր երեխաների պարը, նրանց ելույթը»,-բժիշկը գրել էր իր ելույթում, որն ընթերցեցին հիմնարկեքի արարողության ժամանակ։
Նունե ԱՐԵՎՇԱՏՅԱՆ
