Պաշտպանության նախարար Դավիթ Տոնոյանը սահմանում տիրող իրավիճակը գնահատում է վերահսկելի և այս պահի դրությամբ կայուն։ «Ավելին չեմ կարող ասել»,- ասաց նախարարը։
Անդրադառնալով ադրբեջանցիների կողմից գերեվարված, Տավուշի Բերդավան գյուղի բնակիչ, 1984 թ. ծնված Կարեն Ղազարյանի վերադարձը կազմակերպելուն, Դավիթ Տոնոյանն ասաց․ «Ինքը ռազմագերի չէ, եթե ռազմագերի լիներ, կլիներ զինծառայող, ինքը գերեվարված է ու Ադրբեջանի կողմից հայտարարված է որպես զինվորական։ Մենք ապացույցները ներկայացրել ենք Միջազգային Կարմիր Խաչի ներկայացուցչությանը, մենք տեղեկացրել ենք համանախագահող երկրներին դեպքի վերաբերյալ, նաև կան որոշ գործողություններ, որոնք որ իրականացվել են Կարեն Ղազարյանի բարեկամների կողմից։ Բարեկամները դիմել են Եվրոպայի մարդու իրավունքների դատարան։
Երեք ուղղությամբ մենք աշխատում ենք, ցավալի է, որ Կարմիր Խաչին մինչ այժմ հնարավորություն չեն տվել այցելելու, բայց որպես անհայտ կորածների և գերիների հանձնաժողովի նախագահ՝ ես անընդհատ կապի մեջ եմ Միջազգային Կարմիր Խաչի ներկայացուցիչների հետ, որպեսզի իրենք հնարավորինս արագ տեսակցեն մեր քաղաքացուն»։
Նունե ԱՐԵՎՇԱՏՅԱՆ
Լուսանկարը՝ Արծրուն Հովհաննիսյանի ֆեյսբուքյան էջից
