«Դրո» գործով ցմահ ազատազրկման դատապարտված Արմենակ Մնջոյանի գրքի շնորհանդեսին, որը տեղի ունեցավ երեկ երեկոյան, Առնո Բաբաջանյանի անվան համերգասրահում, շատերը մնացին ոտքի վրա, քանի որ տեղերը սպառված էին:
«Աղօթարանի» շնորհանդեսին կարճ ժամանակով մասնակցեց արդարադատության նախարար Արտակ Զեյնալյանը, մասնակիցների մեջ տեսանք ԱԺ պատգամավոր, ՔՊ-ական Հովիկ Աղազարյանին, ռեժիսոր Հարություն Խաչատրյանին, «Սասնա ծռերին»`Ժիրայր Սեֆիլյանին, Վարուժան Ավետիսյանին:
Երեկոն զարդարեց Ա. Մնջոյանի ազգական, երգչուհի Մերի Մնջոյանը, Արմենի մասին իրենց խոսքն ասացին նրա ընկերներից, քաղաքական գործիչ Արմեն Աղայանը, նարեկացիագետ Աշոտ Պետրոսյանը, դուստրը:
Միջոցառմանը մասնակցեցին եւ Արմենակի գրքերից ստացան ապրիլյան քառօրյայի հերոսների հարազատներից… Ներկայացվեց Արմենակ ազատամարտիկը, նկարիչ-երգահանը, մարդ, որի մասին Արմեն Աղայանն ասաց. «Ես ամեն ինչ տեսել եմ, Արմենին բոլոր հանգամանքներում, միասին մի խցում էլ ենք եղել, բայց Արմենին, ով կաղոթի, նոր եմ տեսնում»:
Ելույթ ունեցողները վստահ էին, որ քսան տարուց ավելի անազատության մեջ գտնվող Արմենակը շուտով ազատության մեջ կհայտնվի, նրա հետ նաեւ ցմահականներ` Արսեն Արծրունին, Տիգրան Ավետիսյանը: Գիրքը տպագրվել էր մեկ այլ ցմահականի`Արսեն Արծրունու հոր` Արա Արծրունու մեկենասությամբ:
Գրքի շնորհանդեսը տեղի է ունենալու նաեւ Գյումրիում:
«Արմենակը Տեր Գրիգորի ձեռամբ մկրտվել է բանտի ներսում եւ ընտանի մտերմությամբ կապվել սուրբ Գրիգոր Նարեկացուն, եւ Սուրբն այնքան է հարազատացել, որ շարունակել է նրա ոճով իր աղոթագրությունը, որից մի փունջ զետեղվել է սույն հրապարակման մեջ»,-ասաց Աշոտ Պետրոսյանը:
Ռ. Մ.