«Մենք ենք և մեր քաղաքը», «Մենք ենք և մեր Երևանը», «Մենք կառուցենք, շենացնենք մեր Երևանը, որ Երևանն էլ մեզ տեր կանգնի». այս կարգախոսներով ՕԵԿ-ը քայլարշավ անցկացրեց Ավան վարչական շրջանում: Այնուհետև Առինջի ընտանիքի այգում տեղի ունեցավ ամփոփիչ հանրահավաք:
ՕԵԿ քաղաքապետի թեկնածու Մհեր Շահգելդյանը հայտարարեց՝ աջակցում են ՀՀ իրավապահ կառույցներին մարտի 1-ի բացահայտման և կոռուպցիայի դեմ պայքարում: Ավանցիների հետ հանդիպմանը քաղաքապետի թեկնածուն ասաց. «Մենք ի սկզբանե ասել ենք՝մարտի 1-ը պիտի բացահայտվի, իրավական գործընթացը պետք է շարունակվի: Իսկ կոռուպցիայի դեմ պայքարը պետք է լինի քաղաքական համակարգի առողջացման հիմնասյուներից մեկը»:
Մհեր Շահգելդյանը հույս հայտնեց, որ գնում են մաքուր, մրցակցային պայքարով ընտրությունների:
Դառնալով Ավան վարչական շրջանում գոյություն ունեցող խնդիրներին՝ Մհեր Շահգելդյանը նկատեց՝ իհարկե, ավելի բարի աչքով են նայել Ավանին: Միևնույն ժամանակ արձանագրեց՝ կան խնդիրներ. օրինակ՝ աղբահանության հարցը, անօրինական շինարարությունը, վթարային տները:
Մհեր Շահգելդյանը ավանցիներին ներկայացվեց Երևանի զարգացման հետ կապված իրենց մոտեցումները. մասնավորապես՝ կառավարումը պետք է լինի կոլեգիալ, ավագանիների իրավասությունները պիտի ընդլայնվեն: Պետք է կազմակերպվի սոցիալական բնակարանաշինություն, աշխատատեղեր ստեղծվեն:
Ավանցի գիտնական Հուսիկ Գևորգյանն էլ իր ելույթում վստահեցրեց՝ Մհեր Շահգելդյանը լուրջ կենսագրություն ունի. հիմնադրել է արտակարգ իրավիճակների նախարարությունը, նրա ջանքերով ստեղծվել է ՀՀ-ում Ֆրանսիական համալսարանը, այժմ ղեկավարում է ՀԱՊԿ-ի ակադեմիան, քաղաքական գիտությունների թեկնածու է:
Տաթև ՀԱՐՈւԹՅՈՒՆՅԱՆ
