Մշակույթի նախարարության Մշակութային ժառանգության և ժողովրդական արհեստների վարչության պետի տեղակալ Երանուհի Մարգարյանը «Տեսակետ» մամուլի ակումբում խոսելով մշակույթի նախարարության` ԿԳ նախարարությանը միավորվելու մասին, ասաց, որ կառավարության գործունեության կառուցվածքի վերաբերյալ փաստաթուղթը իրավական առումով մի շարք թերություններ ունի:
«Ստացվում է մի սուպեր նախարարություն, մի կառույց, որը միավորում է մեր պետության համար կարեւոր եւ խոցելի հիմնական 3 բնագավառները, որոնք տարիներ շարունակ առանձին-առանձին կառավարման արդյունքում ունեցել են եւ թերություններ, եւ առաջադիմական ծրագրեր: Ինքնության հետ առնչվող 3 կարեւոր ոլորտները միավորելը մեկ հարկի տակ՝ դա ուղղակի անթույլատրելի է»,-ասաց տիկին Մարգարյանը:
Մանրամասն՝ տեսանյութում
Նրա խոսքերով, մշակույթի նախարարությունը որպես պետական քաղաքական միավոր շատ կարեւոր է մեր պետության համար. «Մշակույթի նախարարությունը պետք է լինի, գոյություն ունենա»:
Aravot.am-ը հետաքրքրվեց` ինչո՞ւ ավելի վաղ չէին ընդվզում, երբ շրջանառվում էր մշակույթի նախարարության օպտիմալացման թեման:
«Մշակույթի նախարարության օպտիմալացման մասին մենք խոսակցություններ չենք լսել: Մշակույթի նախարարությունը մտածել է, որ դա առանձին` մեր ժողովրդի համար կարեւոր բնագավառի ռազմավարությունը մշակող քաղաքական կառույց է, որը միշտ պետք է լինի: Այո, կարող են մշակույթի նախարարությանը միացվել այլ բնագավառներ, բայց երբեւէ չենք մտածել, որ մշակույթը կարող է ածանցվել այլ բնագավառի եւ հայտնվել երրորդական կարգավիճակում»,-ասաց տիկին Մարգարյանը:
Մանրամասն՝ տեսանյութում
Կառավարման փորձագետ Սերոբ Անտինյանը անդրադարձավ պետական կառավարման համակարգի օպտիմալացմանը` իր տեսանկյունից: Նա փաստեց, որ պետական կառավարման համակարգը գերբեռնված է, սակայն պետք է նախ հասկանալ, թե որտեղից է այդ ամենը գալիս: Սերոբ Անտինյանը նշեց, որ գերբեռնվածությունը ժառանգել ենք Խորհրդային Միությունից: Նա հիշեցրեց, որ 87թ. Խորհրդային Հայաստանում կար 29 նախարարություն:
Մանրամասն՝ տեսանյութում
Կառավարման փորձագետը կոչ արեց նման հարցերին մասնագիտորեն մոտենալ. «Ես հասկանում եմ, որ կայացվել է քաղաքական որոշում, որն ունի իր քաղաքական եւ տնտեսական նախադրյալները, բայց մինչեւ որոշման կյանքի կոչելը անհրաժեշտ եմ համարում, որ մասնագետների հետ անցկացվեն խորքային քննարկումներ»:
Մանրամասն՝ տեսանյութում
Ինչ վերաբերում է ՀՀ վարչապետ Նիկոլ Փաշինյանի այն հայտարարությանը, որով առաջարկել էր 3-5 ամիս նախարարության աշխատակիցները գործադուլ անեն, տեսնելու համար, թե մշակույթի կյանքում ինչ կփոխվի, նաեւ ասել էր, որ ինքը նման քայլի գնալու մանդատ է ստացել, Երանուհի Մարգարյանն ասաց. «Թող ընտրություններից առաջ այդպես վարվեին, որ հասկանալի լիներ, թե այդ մանդատն ինչի համար է տրվում»:
Գոհար ՀԱԿՈԲՅԱՆ
Մշակույթի նախարարությունը ինքնանպատակ չպետք է գործի, այն պետք է վարի պետական մշակութային ճիշտ քաղաքականություն: Այն է՝ ազգային մշակույթի պահպանոմը, զարգացումը և տարածումը: Մինչդեռ, Մ.Ն.-ը երաժշտարվեստի գծով ճիշտ հակառակն է գործում՝ չկարողանալով վերահսկել իրեն ենթակա սիմֆոնիկ և կամերային նվագախմբերին, Հայաստանը դարձրել է Եվրոպայի մշակութային գաղութը: Ցայտուն օրինակ է երկրաշարժի 30-ամյակի միջոցառումները, ուր ոչ մի հայկական գործ չհնչեց …
«Թող ընտրություններից առաջ այդպես վարվեին, որ հասկանալի լիներ, թե այդ մանդատն ինչի համար է տրվում»:
—————————————————————————————————–
այս արտայայտութիւնը, առարկայականօրէն, իրողապէս, ճշմարիտ չէ
ընտրութեան օրէն առաջ յստակօրէն յայտնուած էր որ նախարարութիւններ պիտի անհետանան, եւ անոնց կարգին նշուած էր Մշակոյթի նախարարութիւնը
երեւի, ի միջի այլոց, այս նախարարութեան աշխատակազմի անդամներ այնքա՜ն ողողուած էին առօրեայ ծանր գործով, որ չհետեւեցան այդպիսի լուրերու, փութացին իրենց քուէները մեքենաբար տալու իրենց այդ պահի Գործատիրոջ