Երեւան-Էջմիածին ավտոճանապարհին Մանվել Գրիգորյանի կալանքից ազատման դեմ ուղղված քաղաքացիների բողոքի գործողությունները շարունակվում են: Նրանց հետ է հանդիպել «Իմ քայլը» դաշինքի նորընտիր պատգամավոր Հայկ Սարգսյանը: Նա ցուցարարներին հորդորեց բացել ճանապարհը. «Ես այստեղ սադրանք եմ տեսնում»:
Ցուցարարները, սակայն, պնդեցին, որ պահանջում են կալանավորել Մանվել Գրիգորյանին: Պատգամավորը հակադարձեց. «Այսի՞նքն: Դո՞ւք եք ուզում դատավճիռ անել՝ մի քանի հոգով: Դատարան գոյություն ունի»:
Պատգամավորը համոզմունք հայտնեց, որ ցուցարարների գործողություններից տուժում են մյուս քաղաքացիները: Ցուցարարները շարունակում են փակ պահել Երեւան-Էջմիածին ավտոճանապարհը:
Ավելի ուշ ցուցարարները դադարեցրին բողոքի գործողությունները եւ բացեցին մայրուղին։ Ցույցը կշարունակվի երկուշաբթի։
Լուիզա ՍՈՒՔԻԱՍՅԱՆ
