«Տպավորություն չեմ ստացել, որ Ռոբերտ Քոչարյանը ծանոթ է Վահան Շիրխանյանի նամակին». պաշտպան

«Վահան Շիրխանյանի բաց նամակում նշված հանգամանքներին այս պահին ծանոթ ենք մամուլի հրապարակումներից: Երեկվա դրությամբ Ռոբերտ Քոչարյանի հետ նման բան չեմ խոսել եւ տպավորություն չեմ էլ ստացել, որ նա ծանոթ է նամակին»,- «Հայելի» մամուլի ակումբում այսօր լրագրողների հետ հանդիպմանն անդրադառնալով Պաշտպանության նախկին փոխնախարար Վահան Շիրխանյանի՝ Ռոբերտ Քոչարյանին ուղղված բաց նամակին, ասաց Քոչարյանի շահերի պաշտպան, փաստաբան Հայկ Ալումյանը:

«Ես էլ չասացի նամակի մասին, որովհետեւ ավելորդ տեղեկատվությամբ ծանրաբեռնվել չեմ ուզում»,-նշեց նա:

Հիշեցնենք, որ Ռոբերտ Քոչարյանը Մարտի մեկի քրեական գործի շրջանակում մեղադրվում է ՀՀ սահմանադրական կարգի տապալման համար, իսկ Վահան Շիրխանյանը Նորքի «զինված խմբի» գործով մեղադրյալներից է, եւ երկուսի պաշտպանն էլ Հայկ Ալումյանն է: Հարցին՝ «մասնագիտական շահերի բախում չկա՞», Ալումյանն այսպես արձագանքեց. «Հենց շահերի բախում նկատեմ, օրենքով սահմանված քայլեր կձեռնարկեմ: Այս պահին չկա, որովհետեւ տարբեր գործերով են մեղադրվում: Դա նույնն է, թե վիրաբույժը վիրահատի երկու անձանց, որոնցից մեկը մյուսին բաց նամակ է հղում»:

Լուիզա ՍՈՒՔԻԱՍՅԱՆ