Այսօր ՍԴ դատավոր ընտրված Վահե Գրիգորյանն ԱԺ նիստում իր ելույթում հայտարարել էր՝ «Մտնում եմ Սահմանադրական դատարան՝ ստանձնելով ՍԴ նախագահի լիազորությունների եւ պարտականությունների կատարումը», նա նաեւ ասել էր, որ ՍԴ-ում երկու դատավոր կա:
Այս հայտարարությունը տարաբնույթ մեկնաբանությունների տեղիք է տվել: «Իմ քայլը» խմբակցության պատգամավոր Նիկոլայ Բաղդասարյանը լրագրողների հետ զրույցում այսպիսի մեկնաբանություն տվեց. «Սահմանադրության անցումային դրույթներով, եթե չկա նորմ, որն ասում է, որ Սահմանադրական դատարանի անդամները շարունակելու են պաշտոնավարել՝ որպես ՍԴ դատավոր, իրենք չեն կարող պաշտոնավարել, որովհետեւ իրեն ՍԴ անդամ են»:
Բանն այն է, որ հին Սահմանադրությամբ ՍԴ անդամ էին ընտրում, ոչ թե ՍԴ դատավոր: Նոր Սահմանադրությամբ ասվում է, որ ՍԴ դատավոր պետք է ընտրեն այն կարգով, ինչ կարգով, որ նոր խորհրդարանն ընտրեց Վահե Գրիգորյանին, հետեւաբար մյուսները, բացի Արման Դիլանյանից, չեն հանդիսանում ՍԴ դատավոր, որովհետեւ այդ ընթացակարգով չեն ընտրվել:
Վահե Գրիգորյանը խոսել էր երկխոսության մասին: Հարցին՝ Հրայր Թովմասյանին համոզե՞լն է երկխոսություն ասածը՝ Նիկոլայ Բաղդասարյանը պատասխանեց. «Չեմ կարծում Վահե Գրիգորյանը համոզելու խնդիր ունի Հրայր Թովմասյանին: Ուղղակի Հրայր Թովմասյանը, լսելով Վահե Գրիգորյանի ելույթը, պիտի վաղը առավոտյան աշխատանքի չգնա, որովհետեւ ինքը հասկացավ, որ ինքն այլեւս ՍԴ-ի նախագահ չէ»:
Կարդացեք նաև
Մանրամասները՝ տեսանյութում
Հռիփսիմե ՋԵԲԵՋՅԱՆ
