ՍԴ-ն վերջապես հրապարակեց ՀՀ երկրորդ նախագահ Ռոբերտ Քոչարյանի դիմումի հիման վրա` ՀՀ քրեական դատավարության օրենսգրքի 35-րդ հոդվածի և 135-րդ հոդվածի 2-րդ մասի` Սահմանադրությանը համապատասխանության հարցը որոշելու վերաբերյալ գործով որոշումը: Ըստ այդմ, ՍԴ-ն հոդվածներից մեկը ճանաչեց հակասահմանադրական, մյուսը՝ սահմանադրական: ՍԴ-ն հակասահմանադրական է ճանաչել ՀՀ քրեադատավարական օրենսգրքի 35-րդ հոդվածը:
ՍԴ նախագահ Հրայր Թովմասյանն ընթերցեց դատարանի որոշումը, որտեղ նշվում է․ «Սահմանադրական դատարանը որոշեց ՀՀ քրեական դատավարական օրենսգրքի 35-րդ հոդվածը Սահմանադրության ուժով հատուկ պաշտպանությամբ օժտված պաշտոնատար անձանց գործառույթային անձեռնմխելիությունը քրեական գործի վարույթը կամ քրեական հետապնդումը բացառող հանգամանքների թվում չնախատեսելու մասով ճանաչել Սահմանադրության 27-րդ հոդվածի 1-ին մասի 4-րդ կետին, 61-րդ հոդվածի 1-ին մասին, 63-րդ հոդվածի 1-ին մասին և 75-րդ հոդվածներին հակասող և անվավեր»։
Որոշման երկրորդ կետի համաձայն՝ ՀՀ քրեական դատավարության օրենսգրքի 135-րդ հոդվածի 2-րդ մասը համապատասխանում է Սահմանադրությանը։
Բացի այդ, ՍԴ դատավորներ Ֆելիքս Թոխյանը և Արման Դիլանյանը ունեն հատուկ կարծիքներ, որոնք կհրապարակվեն առաջիկայում։ ՍԴ որոշումը վերջնական է և ուժի մեջ է մտնում հրապարակման պահից։ Փաստաթուղթը պետք է հրապարակվի եռօրյա ժամկետում։
Ռոբերտ Քոչարյանի պաշտպանական խմբի անդամ Արամ Վարդեւանյանը լրագրողներին տեղեկացրեց, որ ՀՀ Քր.Դատ օրենսգրքի 35-հոդվածը, այնքանով որքանով չի նախատեսում որեւէ նորմ, կարգավորում հատուկ պաշտպանության միջոցներով օժտված պաշտոնատար անձանց համար, ինչպես, օրինակ, գործառութային անձեռնմխելիությամբ օժտված է ՀՀ պաշտոնաթող նախագահ Ռոբերտ Քոչարյանը, դրանով հակասահմանադրական է, Սահմանադրությանը հակասող եւ անվավեր:
Կարդացեք նաև
Արամ Վարդեւանյանը շեշտեց, որ դրանով խախտվել է ՀՀ երկրորդ նախագահի ՀՀ Սահմանադրության 27-րդ հոդվածով նախատեսված անձնական ազատության իրավունքը. «ՀՀ երկրորդ նախագահի անձնական ազատությունը, բոլորդ քաջ գիտեք, սահմանափակվել է եւ սահմանափակված է ներկայումս»:
Քոչարյանի պաշտպանը նաեւ հավելեց, որ 61 եւ 63-րդ հոդվածներն էլ նախատեսում են արդար դատաքննության իրավունքը, իսկ 78-րդ հոդվածը վերաբերում է ընթացակարգային, կառուցակարգային հոդվածներին եւ որոշակիությանը: Ըստ փաստաբանի, «Քր.Դատ օրենսգրքում չկա ոչ մի նորմ, որը կկարգավորեր նման կարգավիճակով օժտված անձի արդար դատաքննության իրավունքը, երբ խոսքը գնում է իր խափանման միջոցի մասին: ՍԴ-ն երկրորդ կետով անդրադառնալով կալանավորման հոդվածին՝ նշեց, որ այն համապատասխանում է Սահմանադրությանը: Պետք է նկատի ունենալ, որ 35-րդ հոդվածն ընդհանուր նորմ է, իսկ 135-րդ հոդվածը ավելի նեղ կարգավորում է նախատեսում, բայց 135 հոդվածը եւ 35-րդ հոդվածը միմյանց լրացնող հոդվածներ են եւ չեն կարող կիրառվել միմյանցից առանձին: Սա նաեւ Վճռաբեկ դատարանն է ասել»:
Արամ Վարդեւանյանն ասաց, որ 35-րդ հոդվածը վերաբերվում է քրեական հետապնդումը բացառող հանգամանքներին: Նրա ասելով՝ կալանավորումը, որ կիրառվել է մի քանի անգամ, խախտել է Երկրորդ նախագահի անձնական ազատության իրավունքը: Ասաց նաեւ, որ ՍԴ-ն արձանագրել է, որ խախտվել է ՀՀ երկրորդ նախագահի անձնական ազատության իրավունքը, հետեւաբար կալանավորումը չի կարող լինել իրավաչափ, իսկ քրեական հետապնդման վերաբերյալ հարցին խոստացավ պատասխանել որոշմանը ծանոթանալուց հետո:
Մի խումբ քաղաքացիներ երթ են սկսել դեպի գլխավոր դատախազություն, նրանք դժգոհ են ՍԴ որոշումից:
Գոհար ՀԱԿՈԲՅԱՆ
այսինքն Քոչարյանը կարա դուրս գա և մի 10 հոգու սպանի, նրան մեկա չեն կարող կալանել: ռուսն ասումա зашкваливает! Ետ Հրոոյին պիտի նստացնել լավագույն դեպքում Քոչարյանի կաոքը բայց ավելի լավա նստացնե ուրշ բանի վրա….