Գյումրու «Սեւ բերդում» կայացած Անկախության տոնի միջոցառման ժամանակ ներկայացված պարը տարաբնույթ մեկնաբանությունների տեղիք է տվել, ոմանց զայրացրել էր իրենց ձեւակերպմամբ` տղամարդ պարողների «յուբկաներով» պարը:
Aravot.am-ի հետ զրույցում Հայաստանի ազգային պարարվեստի և պարագետների միության նախագահ Կարեն Գեւորգյանը նշեց, որ ինքը չի դիտել միջոցառումը, բայց գիտի, որ դա ՀՀ ժողովրդական արտիստ, ճանաչված բալետմայստեր Ռուդոլֆ Խառատյանի «Զույգ արեգակներ» ներկայացումից հատված է:
«Ես տեսել եմ այդ ներկայացումը, եթե այդ ներկայացումից մի կտոր հանեն, դնեն որեւէ այլ տեղ, կարող է իր ափսեում չգտնվի, որովհետեւ օտար միջավայրում կարող է այլ կերպ ընկալվել; Ես նայել եմ «Զույգ արեգակները» ներկայացումը, որտեղ Ռուդոլֆ Խառատյանի գույներն են, մտածողությունը, իր փիլիսոփայությունն է դրված նախաքրիստոնեական շրջանի, դա լրիվ այլ բան է»,-ասաց Կարեն Գեւորգյանը:
Կարդացեք նաև
Կարեն Գեւորգյան
Ինչ վերաբերում է բեմական հագուստին, ասաց. «Հագուստն ունի ձեւավորող, ներկայացումն ունի բալետմայստեր, պարն ունի ոճային առանձնահատկություն, եւ եթե որակումներ անողները ամբողջական ներկայացումը նայեն իր համատեքստի մեջ, դրամատուրգիական հիմքերով, իրենց կարծիքներն այլ կլինեն: Կարծում եմ, որ ներկայացումը պետք է ճիշտ տեղում եւ ճիշտ ժամանակին նայել:
Ժամանակին Սրբուհի Լիսիցյանն էլ էր ասում, որ պաը պետք է պարել ճիշտ տեղում եւ ճիշտ ժամանակին: Նույնն էլ վերաբերվում է ազգագրական պարերին, որ պարում են Կասկադի հատվածում, դա իր տեղը եւ հատվածը չէ»:
Կարեն Գեւորգյանը կարծում է, որ պարային այդ համարին տրված որակումների հետ համաձայն չէ, պարզապես պարը ճիշտ համատեքստում չի եղել:
Հիշեցնենք, որ Ռուդոլֆ Խառատյանի բեմադրած «Զույգ արեգակներ» ներկայացման մեջ մեկտեղված են դասական, ժամանակակից, մոդեռն, նեոկլասիկ եւ հիփ-հոփ ոճերը, Երաժշտությունն էլ հավաքական է՝ Մաշտոց, Նարեկացի, Ալան Հովհաննես, Խաչատրյան, Բաբաջանյան, Տերտերյան եւ Աշոտ Արիյան: Բալետմայստերն էլ ոգեշնչվել է Նարեկացու «Մատյան ողբերգության» պոեմից:
Գոհար ՀԱԿՈԲՅԱՆ
Լուսանկարը` Ռուդոլֆ Խառատյանի բեմադրած «Զույգ արեգակներ» ներկայացումից:
