Երեւանի ընդհանուր իրավասության Էրեբունու նստավայրում (նախագահող դատավոր Տաթևիկ Ստեփանյան) հոկտեմբերի 7-ին տեղի ունեցավ «Յուրի Խաչատուրովն ընդդեմ Ստեփան Գրիգորյանի» գործով հերթական դատական նիստը:
Հիշեցնենք՝ ՀԱՊԿ նախկին գլխավոր քարտուղար Յուրի Խաչատուրովը քաղաքագետ Ստեփան Գրիգորյանից երկու միլիոն դրամ բարոյական վնասի փոխհատուցում է պահանջում, դատական ծախսերի փոխհատուցում եւ հրապարակային հերքում: Ըստ Յուրի Խաչատուրովի՝ 2018-ի հուլիսի 30-ին «Ա1+» հեռուստաընկերությանը տված իր հարցազրույցում Ստեփան Գրիգորյանը վիրավորել է իր պատիվ ու արժանապատվությունը:
Նշենք, որ Ստեփան Գրիգորյանն իր հարցազրույցում խոսել էր 2016-ի ապրիլյան քառօրյա պատերազմի մասին՝ ասելով, թե որոշ գեներալներ չեն եղել իրենց տեղում, կարճ ժամանակում չեն եկել աշխատավայր, ինչպես նաև մեղադրանքներ էր հնչեցրել առ այն, որ ապրիլյան քառօրյա պատերազմից օրերին որոշ տարածքներ վաճառվել են ՀՀ գեներալների՝ այդ թվում Յուրի Խաչատուրովի կողմից:
Ստեփան Գրիգորյանի շահերի ներկայացուցիչ Հայկուհի Հարությունյանը պնդում է, որ հայցվորը կոնկրետ եւ որոշակի գործողություններ չի ներկայացրել:
Կարդացեք նաև
Aravot.am-ի հետ զրույցում նա նշեց, որ իրենց պնդումները նույնն են մնացել: Այսօրվա դատական նիստին Հայկուհի Հարությունյանը պատասխանեց այն դիրքորոշմանը, որը հայցվոր կողմը ներկայացրել էր նախորդ դատական նիստի ժամանակ: Հայկուհի Հարությունյանը տեղեկացրեց. «Հերթական հակափաստարկների ու պնդումների նիստ էր, արտառոց բան չկար»:
Այս գործով հաջորդ դատական նիստը կկայանա դեկտեմբերի 6-ին՝ ժամը 16.20-ին:
Տաթև ՀԱՐՈՒԹՅՈՒՆՅԱՆ
