«Մամուլում մեղադրանքներ եղան, թե ինչու Հանրային խորհուրդը չի քննարկում Արցախի հարցը: Անկեղծ ասած՝ քիչ բան կա, որ ՀԽ-ն կարող է քննարկել Արցախի հարցի մասին»,-ՀՀ Հանրային խորհրդի այսօրվա նիստում հայտարարեց ՀԽ նախագահ Վազգեն Մանուկյանը:
Ինչ վերաբերում է Արցախյան հակամարտության կարգավորման բանակցային փուլին, Վազգեն Մանուկյանն ընդգծեց՝ Արցախի եւ ՀՀ-ի ժողովուրդները լիազորել են իրենց ղեկավարներին՝ բանակցելու եւ գտնելու մի լուծում, որը կքննարկվի հանրության կողմից. «Բայց մի սահմանափակում դրվեց: Ըստ ՀՀ ԱԺ համապատասխան փաստաթղթի՝ ընդունելի չէ այն փաստաթուղթը, որ Արցախը կարող է լինել Ադրբեջանի կազմում: Մենք մեր ղեկավարներին ուղարկելով բանակցությունների՝ դրել ենք այդ պայմանը»:
Վազգեն Մանուկյանը փաստեց, որ բանակցությունների ժամանակ առաջարկված տարբերակների մի մասը հայտնի է, մյուսը՝ ոչ. «Բայց դա մեր գործը չէ, մենք պահանջում ենք մեր ղեկավարներին քննարկել որեւէ լուծման տարբերակ եւ այն ներկայացնել ժողովրդին, որը պետք է քննարկել: Անշնորհակալ է եւ վնասակար, եթե մենք հիմա քննարկենք, թե ինչ տարբերակ պետք է առաջարկել»:
Հիմա, ըստ Վազգեն Մանուկյանի, բանակցություններում անորոշություն է, որովհետեւ հայտնի չէ, թե որն է տեսլականը. «Ճիշտ կլինի, եթե վարչապետի հետ ՀԽ փակ նիստ լինի, նա իր կարծիքները ներկայացնի»:
Կարդացեք նաև
Ինչ վերաբերում է «Արցախը Հայաստան է» կամ «Արցախը ՀՀ մարզ է» բնորոշումներին, Վազգեն Մանուկյանը նկատեց՝ եթե Արցախն անկախ պետություն է եւ ուզում է միավորվել ՀՀ-ի հետ, նախաձեռնությունը պետք է լինի Արցախի կողմից. «Նորից չասեմ, թե ինչ հետեւանքների դա կարող է բերել»: Ապա Վազգեն Մանուկյանը հայտարարեց՝ Արցախի հարցի շրջանակն այսքանն էր, եւ այսօրվա նիստում Արցախի հարցը չեն քննարկելու:
ՀԽ անդամ, քաղաքագետ Ստյոպա Սաֆարյանը չհամաձայնեց. «Մենք կարծիք չենք ասելո՞ւ»: «Ոչ»,-պատասխանեց Մանուկյանը:
Սաֆարյանը հիշեցրեց, որ ՀԽ-ն ունի չկատարված հանձնարարություն, որը ՀԽ-ի հետ հանդիպման ժամանակ տրվել է վարչապետի կողմից՝ պարզել հանրության շրջանում Արցախի հարցի շուրջ հանրային ընկալումը՝ «ստատուս քվոն»:
ՀԽ անդամ Արշակ Սադոյանը վրդովված ընդհատեց. «ի՞նչ ստատուս քվո: Բազմակարծիք հանրության մեջ ի՞նչ ստատուս քվո կարող է լինել»:
Վազգեն Մանուկյանը դիմեց ՀԽ անդամներին՝ «եթե Սաֆարյանի ասածը հասկանալի էր, անցնենք առաջ»: «Ո՜չ»,-լսվեց դահլիճից:
Իրավիճակում պարզություն մտցրեց ՀԽ անդամ, բնապահպան Կարինե Դանիելյանը՝ ասելով, որ Ստյոպա Սաֆարյանն ուզում էր ասել ոչ թե «ստատուս քվո», այլ՝ «կոնսենսուս»: Սաֆարյանը համաձայնեց, որ խոսքում վրիպել է:
Վազգեն Մանուկյանն արձագանքեց. «Հաշվի առեք նաեւ պարոն Սաֆարյանի ասածը, եւ այսքանով ավարտենք, մենք հիմա քննարկում չենք անում»:
Մանուկյանի խոսքով՝ ՀԽ այսօրվա նիստում Արցախի վերաբերյալ սահմանափակվելու են այսքանով, իսկ այլ քննարկումները՝ առաջիկայում:
Մանրամասն՝ տեսանյութում
Ուղիղ։ Հանրային խորհրդի նիստ։ Նախատեսվում է, որ ՀԽ նախագահ Վազգեն Մանուկյանը կմեկնաբանի Արցախի հարցի շուրջ իր եւ Փաշինյանի հնարավոր տարաձայնությունների մասին գնահատականները
Gepostet von Aravot am Donnerstag, 7. November 2019
Լուիզա ՍՈՒՔԻԱՍՅԱՆ
