Հայաստանը դեմ է քվեարկել ՄԱԿ-ի գլխավոր վեհաժողովում Ուկրաինայի առաջարկած բանաձևին՝ Ղրիմում և Սևաստոպոլում մարդու իրավունքների խախտումների վերաբերյալ:
Քվեարկությունը տեղի է ունեցել Նյու Յորքում՝ ՄԱԿ-ի կենտրոնական գրասենյակում: Բանաձևին կողմ է քվեարկել 65, դեմ՝ 23 երկիր, 83 երկիր ձեռնպահ է մնացել:
Դեմ արտահայտված երկրներն են, Հայաստանից բացի, Ռուսաստանը, Բելառուսը, Բուրունդին, Կամբոջան, Չինաստանը, Կուբան, Հյուսիսային Կորեան, Էրիթրեան, Գվինեան, Հնդկաստանը, Իրանը, Ղազախստանը, Ղրղզստանը, Մյանմարը, Նիկարագուան, Ֆիլիպինները, Սերբիան, Սուդանը, Սիրիան, Ուգանդան, Վենեսուելան, Զիմբաբվեն:
Բանաձևը դատապարտում է «ակտիվիստների և մարդու իրավունքների պաշտպանների զանգվածային ձերբակալությունները՝ ահաբեկչությանն աջակցելու մեղադրանքների հիման վրա» և «Ղրիմի բնակիչներին ՌԴ զինված ուժեր զորակոչելու փորձը»:
Կարդացեք նաև
Փաստաթղթի հեղինակները պահանջում են դադարեցնել աջակցությունը Ղրիմում ժողովրդագրական վիճակի փոփոխությանը, ինչպես նաև դադարել հետապնդել իրենց մտքերի արտահայտման համար ձերբակալված անձանց և ազատ արձակել նրանց, ինչպես նաև անհապաղ ազատ արձակել Ուկրաինայի բոլոր անօրինական ձերբակալված քաղաքացիներին և ապահովել նրանց անխոչընդոտ վերադարձը հայրենիք:
Պատրաստեց՝ Վիկտորյա ԱՆԴՐԵԱՍՅԱՆԸ
