Ինչպես հայտնել էինք, «Բաց հասարակության հիմնադրամներ-Հայաստան»-ի գործադիր տնօրեն Լարիսա Մինասյանն այսօր լրագրողների հետ զրույցում անդրադարձավ Ջորջ Սորոսի հիմնադրած գրասենյակի հասցեին Հայաստանում վերջին շրջանում ծավալված հակաքարոզչությանը: Ապա նա հրապարակեց ԶԼՄ-ներում առավել հաճախ շրջանառվող կեղծ լուրերը հիմնադրամի աշխատանքի վերաբերյալ:
«Սուտ-Ջորջ Սորոսն իր ունեցվածքը ձեռք է բերել տարբեր երկրներում արհեստական ճգնաժամեր եւ հեղափոխություններ հրահրելով, եւ «Բաց հասարակության հիմնադրամները» դեր են ունեցել այդ գործում:
Փաստ-Ջորջ Սորոսն իր ունեցվածքը ձեռք է բերել ժողովրդավարական երկրների ֆինանսական շուկաներում, որոնք վերահսկվում են խիստ կարգավորիչ մարմինների կողմից:
Սուտ-Հիմնադրամը ֆինանսավորել է Ադրբեջանի հանդեպ միակողմանի խաղաղության քարոզը:
Կարդացեք նաև
Փաստ-Հիմնադրամն Ադրբեջանի հանդեպ խաղաղության քարոզ չի ֆինանսավորել: ԼՂ հակամարտության հետ կապված որեւէ նախաձեռնություն երբեւէ չի ֆինանսավորվել:
Սուտ-Հիմնադրամը դրամաշնորհ է տվել ՀՀ աշխատանքի եւ սոցիալական հարցերի նախարար Զարուհի Բաթոյանին, նրա տեղակալ Գեմաֆին Գասպարյանին, ԿԳՄՍ փոխնախարար Արեւիկ Անափիոսյանին եւ պետական պաշտոն զբաղեցնող մի շարք անձանց:
Փաստ-Հիմնադրամը կազմակերպություններին է դրամաշնորհ տրամադրել, որոնցում մինչեւ պետական պաշտոն զբաղեցնելն աշխատել են այդ անձինք:
Սուտ-Հիմնադրամը կապ ունի «Սասնա ծռեր» կուսակցության հետ:
Փաստ-Հիմնադրամը երբեւէ որեւէ կապ չի ունեցել եւ չունի կուսակցության հետ, չի աջակցել եւ չի աջակցում որեւէ կուսակցության:
Սուտ-Հիմնադրամն աջակցում է Հայ առաքելական եկեղեցու դեմ հակաքարոզչության իրականացմանը
Փաստ-Հիմնադրամը պաշտպանում է յուրաքանչյուրի խղճի եւ դավանանքի ազատությունը: Ի դեպ, Հայ առաքելական եկեղեցին միակ կրոնական կազմակերպությունն է, որը 2010-11թթ. ստացել է դրամաշնորհ՝ 50 000 դոլարին համարժեք գրանտ, որի շրջանակում կազմակերպել է 130 երեխայի ամառային հանգիստը:
Սուտ-Հիմնադրամը ֆինանսավորել է «Իմ մարմինն անձնական է» գրքի հրապարակումը, «Մել» ֆիլմը, «Հուզանք ու զանգ» ներկայացումը, «Բռնության ձայնը» անանուն նամակների հրապարակումը, Ամուլսարի հանքի շահագործման դեմ պայքարը:
Փաստ-Հիմնադրամն աջակցում է մեր երկրում ամենաբարդ եւ խնդրահարույց հարցերի բաց եւ հանրային քննարկմանը, բայց չի ֆինանսավորել այդ նախաձեռնություններից որեւէ մեկը:
Սուտ-Ջորս Սորոսը եւ հիմնադրամը քարոզում են աբորտները:
Փաստ-Հիմնադրամը պայքարում է սեռով պայմանավորված հղիության արհեստական ընդհատումների դեմ, միաժամանակ՝ աջակցում կանանց առողջության պահմանման նպատակով ծառայություններ ստանալու իրավունքը, որն իրականացվում է կամավոր եւ ինքնուրույն:
Սուտ-Հիմնադրամը խրախուսում է տրանսգենդեր-մարմնավաճառների քարոզը:
Փաստ-Սա բացարձակ սուտ է, նման քարոզ երբեւէ չի իրականացվել:
Սուտ-Հիմնադրամն իրականացնում է մարդասպանների եւ ահաբեկիչների հերոսացման քարոզ:
Փաստ-Հիմնադրամը նման քարոզ երբեւէ չի իրականացնել, այլ պաշտպանել եւ իրականացրել է արդարադատության հասանելիության հիմնարար իրավունքը»,-հայտարարեց Լարիսա Մինասյանը:
Լուիզա ՍՈՒՔԻԱՍՅԱՆ
