ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանի կարծիքով՝ Իդլիբի հարցով ՌԴ նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի պայմանավորվածությունը «հանգրվանային» է:
«Փաստարկ» մամուլի ակումբում լրագրողների հետ հանդիպմանը նա վստահեցրեց՝ վաղ թե ուշ լարված իրավիճակն այնտեղ սկսվելու է և մանրամասնեց. «Թուրքիան և նրա ենթակա զինված խմբավորումները ձեռքի տակ են պահում Սիրիայի մի մասը, իսկ Սիրիան լի է վճռականությամբ իր ամբողջ տարածքն օտար ուժերից ազատագրելու հարցում: Իսկ այդ համաձայնությունը հնարավորություն է տալիս Թուրքիային պահպանել վերահսկողությունը շրջանում»:
Ըստ Ռուբեն Սաֆրաստյանի՝ սա մի հերթական պայմանավորվածություն է, որի հիման վրա Թուրքիան հնարավորություն է ստանում ձևական, չակերտավոր օրենքով իր զինված ուժերը պահել իր տարածքից դուրս հարևան ինքնիշխան երկրի տարածքի վրա:
Անդրադառնալով մարտի 6-ին հայ դիրքապահների ուղղությամբ տեղի ունեցած դիվերսիոն փորձին, որը, ըստ ՀՀ Պաշտպանության նախարարության հաղորդագրության՝ հայ դիրքապահները կանխել են, Ռուբեն Սաֆրաստյանն ասաց, որ դա կապված է թուրքական դիվանագիտական խաղի հետ: Նա, մասնավորապես հայտարարեց. «Թուրքիան ցանկանում է ցույց տալ Ռուսաստանին, որ կարող են խրախուսել Ադրբեջանին, որպեսզի վերջինս ավելի ակտիվ քայլեր ձեռնարկի մի երկրի նկատմամբ, որտեղ տեղակայված է ռուսական ռազմակայան»:
Կարդացեք նաև
Տաթև ՀԱՐՈՒԹՅՈՒՆՅԱՆ
