«Այս վիրուսը չգիտի սահմաններ, չի ճանաչում ռասսա կամ կրոն, չգիտի՝ վարչապե՞տ եք դուք, թե՞ ոչ»,- «COVID-19 առերեսվելով համաշխարհային վախին» թեմայով առցանց վեբինարի ընթացքում ասաց Լոնդոնի կայսերական քոլեջի Գլոբալ առողջապահական նորարարությունների ինստիտուտի տնօրեն Լորդ Արա Դարզին։
«Վիրուսը բոլորիցս առաջ է, ինչ էլ փորձենք մենք անել»,- ասաց նա՝ հավելելով, որ աշխարհում առողջապահության համակարգ չկա, որը կարող զբաղվել այն 20 տոկոս մարդկանցով, որոնք որ ծանր վիճակում կլինեն։ «Միակ բանը, որ մենք կարող ենք անել այս բեռը՝ մահացության առումով թեթևացնելու համար՝ առաջարկը և պահանջարկը ճիշտ բալանսավորելն է։ Քանի որ առաջարկը բավականին սահմանափակ է, այսինքն՝ առողջապահական ծառայություններ մատուցելը, հուսով եմ բոլորը կլսեն Դեյվիդին (նկատի ունի COVID-19-ի հարցերով Առողջապահության համաշխարհային կազմակերպության հատուկ պատվիրակ Դեյվիդ Նաբարրոյին), թե ինչ է պետք անել»։
Արա Դարզին բերեց Միացյալ Թագավորության օրինակը, որը իր բնակչության մեջ առանձնացրել է 1.5 միլիոն քաղաքացիներին, որոնք ռիսկային գոտում էին գտնվում, որոնք պետք է ինքնամեկուսանան։ Նա կարծում է, որ պետք է նաև ավելացնել մահճակալները։
«Եթե մենք չգիտենք այս վիրուսի տարածվածությունը, եթե մենք չգիտենք այս վիրուսի վերարտադրության մակարդակը, չեք կարող հավատալ մոդելներին, դուք կհավատաք նրան, ինչ գիտեք»,- ասաց Արա Դարզին՝ նշելով, որ պատմությունը ցույց է տալիս, որ պանդեմիայի ժամանակ պետք է միջամտել և մեկուսացնել՝ նվազեցնելու համար վիրուսի վերարտադրության մակարդակը։
Կարդացեք նաև
Նա կարծում է, որ մարդկանց փակի տակ պահելու ռեժիմը երկար չի աշխատի. «Լավագույն դեպքում, կարող եք 3 շաբաթի հասցնել, միգուցե՝ 4 շաբաթի։ Դուք կտեսնեք սոցիալական խանգարում, եթե շարունակեք այդ 3-4 շաբաթից հետո։ Եկեք չմոռանանք դրա տնտեսական ազդեցությունը, չմոռանանք տնտեսական ազդեցությունը առողջության վրա. Տնտեսական անկումների ժամանակ մահացության մակարդակը ավելանում է»։
Ամի ՉԻՉԱԿՅԱՆ
