Վարչապետ Նիկոլ Փաշինյանի անունից անհայտ անձանց կողմից քաղաքացիներին զանգահարելու վերաբերյալ ԱԺ փոխնախագահ Ալեն Սիմոնյանի դիմումի հիման վրա քրեական գործ չի հարուցվել:
«Հայկական ժամանակ»-ի գրավոր հարցմանն ի պատասխան Ազգային անվտանգության ծառայության տնօրենի աշխատակազմի ղեկավարի պաշտոնակատար Ն. Մարգարյանը նշել է, որ «ՀՀ վարչապետի կողմից քաղաքացիներին զանգահարելու տեսանյութի ձայնագրության օգտագործմամբ անհայտ անձանց կողմից փակ համարով քաղաքացիներին զանգահարելու եւ տպավորություն ստեղծելու, թե իբր վարչապետն է նրանց զանգահարում» բովանդակությամբ հայտարարության կապակցությամբ ՀՀ ազգային անվտանգության ծառայությունում նյութեր չեն նախապատրաստվել և քրեական գործ չի հարուցվել:
Ըստ ԱԱԾ-ի՝ նշված հայտարարությունում առերևույթ հանցագործության հատկանիշներ չեն եղել:
Հիշեցնենք՝ ապրիլի 10-ին Ալեն Սիմոնյանը ֆեյսբուքյան իր էջում գրել էր. «Վերջին օրերին ինչ-որ անձինք փակ համարից զանգահարում են քաղաքացիներին և օգտագործելով վարչապետ Նիկոլ Փաշինյանի՝ քաղաքացիներին զանգահարելու տեսանյութի ձայնագրությունը՝ ձայնի միջոցով փորձում տպավորություն ստեղծել, թե իբր վարչապետը զանգահարել է իրենց»:
Միլենա ԽԱՉԻԿՅԱՆ
Կարդացեք նաև
Հոդվածն ամբողջությամբ՝ «Հայկական ժամանակ» օրաթերթի այսօրվա համարում:
